嘩嘩嘩！又嚟又嚟，淫賤黎旗下爛果報又砌生豬肉，又特別針對長和系主席李嘉誠，又係譁眾取寵，又係惡意中傷。功夫茶想問一問淫賤黎，你煩唔煩呀？你厭唔厭呀？
即係咁，爛果報有一篇報道講到天水圍大部分街市由領匯承辦，租金高企之下居民被迫捱貴餸，「悲情城市」街市物價普遍較元朗、屯門同灣仔更貴，一棵菜心差價高達百分之五十。本來呢，問題不大，係人都知領匯掠水㗎啦，你去口誅筆伐冇人話唔啱。之不過咁，呢一份無限上綱嘅爛果報居然食住上兼夾打橫嚟，報道下面畫蛇添足整一段配稿叫做「北領匯南長實貴租抬物價」，無情白事又將長實拖落水。
選擇性炒作嘅爛果報話喎，《南華早報》去年有一篇舊聞講到，嘉湖山莊發展商MightyCity開發項目前，喺一九八二年同政府協議，限制該區政府物業內嘅商業項目不得影響發展商嘅商業營運，藉此得出長實壟斷嘅荒謬結論。
喂，其實呢段陳年報道已經指出兩點，首先，協議訂立之時長實並非MightyCity嘅大股東，只佔百分之十二點五權益，幾年後先至增持；其次，協議已於二○○二年取消。既然協議至今取消咗九年嘞，天水圍嘅種種問題點解又會關長實事嘅呢？爛果報對於鐵一般嘅事實視而不見，夾硬將天水圍街市物價同陳年舊聞混為一談，肯定係別有用心啦！
至於係乜嘢用心咯喎，講來講去又係錢作怪。李嘉誠由始至終睇唔起自認契弟嘅淫賤黎吖嘛，唔願意浪費金錢喺壹淫媒落廣告，淫賤黎咪死纏爛打囉，不斷惡意中傷，長期含血噴人，目的不外乎變相恐嚇勒索：你落廣告啦，你畀錢我吖，你一落廣告就唔再抹黑你㗎喇。
冇耐前之嘛，爛果報又係無中生有玩針對，大字標題話李嘉誠重建位於深水灣道七十九號大宅獲贈近萬呎樓面，政府明益喎。呢單嘢都唔使浪費筆墨多加解釋，淨係一個事實已經足以駁回所有無厘頭指控。誠哥晨早已經向政府補地價五千四百幾萬元，獲贈云云，九唔搭八。
功夫茶有一件事始終唔明，其實淫賤黎先至係政府明益嘅既得利益者，爛果報點解唔大字標題數臭自己呢？壹淫媒違反《淫褻及不雅物品管制條例》過百次，次次都係放生，餐餐都係輕判，罰款一萬幾千濕濕碎，呢啲先至係貨真價實嘅政府明益吖嘛。
唯恐天下不亂嘅壹淫媒妖言惑眾煽風點火，搞到香港愈來愈烏煙瘴氣，既仇富，又仇商。計功夫茶話齋，淫賤黎千祈唔好忘記自己都係富豪一族，徹頭徹尾就係奸商一個，仇富唔係好過癮㗎咋，仇商更加捉蟲到極。你知啦，如果有人發起打倒為富不仁嘅奸商，第一時間衝去包圍壹淫媒總部，咁就真係自取滅亡咯！