古人話，君子不立危牆之下，提醒大家唔好去危險嘅地方，但係唔知點解，港府官僚連咁簡單嘅道理都唔識，居然對港人立於危牆之下闊佬懶理，關人個關。
埃及爆發大型反政府示威，局勢急轉直下，當地政府動用武力鎮壓，首都開羅槍林彈雨，死傷枕藉，多個主要城市宵禁，連著名景點金字塔都要暫時關閉，甚至有香港旅行團滯留當地添。但唔知點解，港府雖然收到唔少市民查詢，硬係唔肯發出黑色旅遊警示，你話係咪靠害呀？
好彩旅遊業議會自己執生，宣布即日起取消所有埃及團。而保安局副局長黎棟國就出嚟死撐，話政府其實好關心香港人嘅安全，至於係咪發出黑色旅遊警示，就要視乎當地有冇具體威脅，現時埃及嘅示威主要集中喺政府大樓同廣場，唔涉及旅遊地點，所以只要發出較低級嘅紅色旅遊警示，繼續「密切留意」就得喎。
功夫茶好想請問黎棟國，究竟乜嘢叫具體威脅？子彈橫飛都未算？宵禁都未夠大鑊？嗱，保險業界提醒，萬一旅客因埃及暴動而傷亡，連保險都冇得賠，唔通港府要等到搞出人命至肯「密切留意」？
計功夫茶話齋，港府死都唔肯發黑色警示，就係最具體嘅威脅。正如立法會議員批評，家陣埃及又有暴亂又有宵禁，絕對唔適合旅遊，港府應急唔急，只發出紅色警示肯定低估危險性，搞到旅遊業界同旅客好尷尬。
最無奈嘅係，報咗埃及團嘅市民回水無期，而當局就關人個關，話旅行社、航空公司同酒店嘅交易係商業決定，政府管唔到咁多喎。查實，旅遊業界早已達成共識，只要當局發出黑色警示，事前預訂嘅團費、機票同酒店都可以取消，依家搞到退款安排立立亂，完全係由於當局反應遲鈍造成。
講到反應遲鈍，又點止今次吖。呢，率先爆發騷亂嘅突尼斯，港府直頭連旅遊警示都冇發添。理由極之荒謬，原來本港嘅旅遊警示只覆蓋六十個國家及地區，唔包括突尼斯喎，你話係咪荒謬絕倫吖！
唉，港府墨守成規，隨時可以害死人㗎。○八年泰國發生大規模騷亂，由於港府太遲派出包機，間接害死一位香港旅客。事後，港府耍咗一輪大龍鳳，包括推出三色旅遊警示，結果咪又係得個吉。
旅遊警示漏洞多多唔在講，當局嘅執行更加係不知所謂。計功夫茶話齋，出門旅行最緊要自求多福，千祈唔好信晒當局呀，否則，隨時叫天不應，叫地不靈吖！
毛澤東話，唔犯錯嘅人係豬，犯錯而唔改嘅人係死豬。泰國包機事件歷歷在目，港府官僚完全冇吸取教訓，睇嚟佢哋嘅智慧真係同死豬冇乜分別！