如果有人問你，成個地球有幾多個國家呀？你未必答得出，一來可能你比較傻瓜，嚴重缺乏常識；二來可能你比較謹慎，明知點講都死，所以索性唔答。查實呢，你可以籠統少少咁講，全球有大約二百個國家。之所以冇辦法講得出準確數字，皆因政治爭拗之下「國家」嘅定義好鬼死麻煩㗎，遠嘅唔講，淨係近在咫尺嘅台灣都玩死你。
好嘞，既然全球有大約二百個國家，咁就證明香港保安局上上下下都係大傻瓜！
嗱嗱嗱，唔好以為功夫茶亂噏呀，完完全全有事實根據。大家都知北非國家突尼斯最近爆大鑊啦，人民力量推翻獨裁總統，然後搞到雞犬不寧，動亂造成死傷枕藉，唔使去戲院都見到「讓子彈飛」。理論上保安局應該發出旅遊警示，勸喻港人同胞唔好前往突尼斯身陷險境，否則山長水遠救你唔到。而事實上突尼斯係新興嘅旅遊熱點，不少香港旅行團正在當地親身體驗子彈橫飛嘅驚慄氛圍。好衰唔衰，保安局居然成碌葛咁冇任何反應，硬係唔發旅遊警示。
因乜事幹咁奇怪嘅呢？原來呢個保安局簡直係一隻井底之蛙，按照佢哋現有機制，旅遊警示嘅覆蓋範圍只有六十個國家及地區，突尼斯係唔包括在內嘅，所以冇得發旅遊警示。換言之，全球有百幾個國家係「唔存在」㗎。保安局好比一隻懵到上心口嘅青蛙，見到嘅世界就係井口對上嘅天空，你話係咪荒天下之大謬！
話時話，功夫茶好有興趣想睇睇保安局嗰一份騎呢到極嘅名單，除咗突尼斯之外仲有邊個國家係「唔存在」嘅呢？斷估海盜橫行嘅索馬里應該都唔屬於覆蓋範圍，你知啦，保安局傻瓜成咁，隨時以為索馬里係一個好「索」名叫「馬里」嘅女人，未必會提醒市民千祈唔好送羊入虎口㗎。
官眼不見突尼斯，全球居然有超過三分二國家排除於旅遊警示嘅覆蓋範圍以外，到底會造成乜嘢後果？大家不妨設想一個場景，有條盲毛想去國家甲旅行，事前又唔睇新聞喎，唔知當地正在戰火連天，打仗打到血流成河。呢條盲毛淨係走去問保安局，國家甲有冇旅遊警示呀？局方照本宣科，好官腔咁話，冇喎，完全冇旅遊警示。盲毛梗係放心上路㗎啦，點不知，一落機，彈如雨下，客死異鄉！
即係咁，旅遊警示嘅制度既然係咁支離破碎，漏網之魚多到難以置信，有制度反而更加累事過冇制度。若然出外旅遊人士真係信晒你嘅所謂旅遊警示，一個唔覺意真係會誤闖枉死城㗎！
立法會保安事務委員會主席涂謹申就講得啱嘞，當局應該考慮「有旅行團去就要包入名單之內」。保安局冇針對突尼斯發出旅遊警示，萬一有香港人喺當地遇難，條數都唔知點計。
唉，計功夫茶話齋，好心保安局唔好咁傻瓜啦，地球好大㗎，國家好多㗎，一味踎喺井底辦公，有乜資格享受高薪厚祿呀！