大家都知香港消防處嘅裝備係幾咁老爺o架啦，救護車經常死火跪低唔在講，最令人心噏嘅係通訊系統落後，害到消防員叫天不應、叫地不聞之下壯烈犧牲。既然裝備老爺，咁就梗係有必要盡快更換o架啦，反正政府冇乜嘢叻，就係錢多，財多自然好辦事。事實上，政府上年度預留五億一千五百萬元畀消防處採購裝備，款額較對上一年增加一點三倍。
之不過咁，大家有冇聽過「錢多人傻」？即係咁，普天之下唔少傻瓜有錢都唔知應該點樣使，往往使咗好多冤枉錢，消防處就係典型錢多人傻嘅大傻瓜。消防處走去買法國製油壓升降台，哎吔，爆喉；消防處走去買新款煙帽系統，哎吔，冇貨；最搞笑嘅係消防處走去買救護車，竟然冇考慮到實際路面情況，買番嚟嘅新車比舊款白車高出三十厘米，無法通過限高三米嘅通道，車身又比舊車闊咗十厘米，部分救護站要貼出一張咁荒謬絕倫嘅告示：新款救護車請勿進出。
採購裝備經常出問題吖嘛，於是乎政府罕有地派出效率促進組展開研究。左研研，右究究，效率促進組得出一個結論，消防處犯咗五宗罪。一，欠缺全面策略，管理亦欠條理；二，無資料顯示不同尺碼制服存貨量，令處理換制服申請時出現困難；三，無專責隊伍負責採購工作，採購工作交由無採購專才嘅單位負責；四，欠缺有效嘅管理架構監察採購工作；五，無電腦系統處理採購，要大量人手處理。
嘩嘩嘩，最匪夷所思嘅係第五宗罪，今時今日乜嘢世界呀，居然唔用電腦而用人手？唔通消防處高層一個二個都係食古不化嘅深山大野人？喂，電腦唔係乜嘢高科技o架咋，基本上阿貓阿狗都識用，大拿拿成億成億咁去大手購物，冇可能以最容易出錯嘅人手處理啫，吓話！
唉，浪費公帑都尚在其次，錢財身外物吖嘛，再加上財爺成日計錯數，財赤分分鐘變盈餘，浪費公帑唔使死嘅，最令人擔心嘅係危及寶貴生命，隨時真係會有人無辜辜慘死。你知啦，消防處所有裝備都圍繞住一個中心思想：救人。大佬，呢樣裝備話唔得，嗰樣裝備話唔掂，點樣救人呀？
鑑於消防處採購能力勁差，效率促進組提出十項建議，協助該處糾正問題。計功夫茶話齋，唔理係十項建議抑或係百項建議，歸根究柢最重要嘅係一項建議，更換裝備之前必須更換腦袋。
所謂更換腦袋，意思係話唔可以傻傻更更懵到上心口。就以人手處理採購事宜為例吖，邊有人傻到唔用電腦o架？你唔去更換腦袋，咁咪冇辦法與時並進囉，傻瓜！
至於更換腦袋嘅第二重意思就係咁，萬一消防處由始至終都唔可以改善買錯裝備入錯貨嘅陋習，唔好意思嘞，麻煩相關傻瓜人頭落地，換過另一批有腦之士負責。
一言以蔽之，若然消防處袞袞諸公冇腦，畀幾多錢你去更換裝備都冇用啦，死得人o架！