如果你入屋爆竊，係咪將贓物歸還畀苦主就乜事都冇？梗係唔得啦，偷咗就係偷咗，絕對唔可以一筆勾銷。之不過咁，喺影視處助紂為虐之下，原來壹淫媒犯法真係可以當冇事o架，呢啲咪就係無法無天囉！
壹淫媒旗下爛果報網站動新聞上月二十六日上載一段名為「大咪俾人目及 平胸亦自信」嘅短片，名義上係勸喻女性唔好因為胸細而自卑，實際上梗係掛羊頭賣狗肉啦。片中可見女性胸部特寫，其中一段仲係裸胸露點，無遮無掩清晰可見。本來呢，淫審處已經將短片正式評為第二類不雅物品，正常嚟講梗係要檢控o架啦。哈，你估負責執法嘅影視處有乜反應吖嗱？佢哋話喎，由於有關網站負責人已刪除片中不雅內容，合乎互聯網供應商協會業務守則嘅要求，因此該處不擬採取進一步行動。
喂喂喂，被評為第二類不雅物品係犯法㗎，犯法當然應該受到法律制裁o架啦。根據本港法例，發放不雅物品係嚴重刑事罪行，初犯者最高罰款四十萬元及監禁一年，再犯者最高罰款八十萬元及監禁一年。既然係嚴重刑事罪行，有乜可能輕輕放過罪犯呀！
其實，同類事件都唔係第一次o架嘞。舊年十月壹淫媒旗下網站以「如何自行檢查乳房」為名，播出一輯女子裸露胸部嘅短片，四分鐘片段全無打格仔處理，大特寫加上搓揉按壓乜都有齊，結果被淫審處正式評為第二類不雅物品。壹淫媒明目張膽宣淫販賤，直情係挑戰法律同官威，點不知影視處居然話相關網站已經加咗適當警告字句，合乎業務守則要求，所以唔會採取進一步行動。
功夫茶想問一問影視處袞袞諸公，假如淫賤黎捅咗閣下一刀，係咪求其警告一聲，然後掹番把刀出嚟，咁就可以當冇事？如果咁都得，呢個世界冇人會做正人君子咯，個個都去打家劫舍啦！
唉，講來講去都係港英餘孽包庇縱容，縱到淫賤黎簡直無惡不作膽生毛。莫講話影視處有法不依唔檢控吖，即使真係檢控咁又點呢？壹淫媒旗下刊物違反《淫褻及不雅物品管制條例》超過一百次o架喇，餐餐都係輕輕罰款一萬幾千了事，從來冇一次係認真懲處。既然全無阻嚇力，即係姑息養奸囉。
計功夫茶話齋，見到影視處擺明車馬放生，蠱蠱惑惑嘅淫賤黎一定變本加厲。你話事後刪除就冇事吖嘛，咁就索性大播特播色情變態嘅短片咯，有幾鹹濕得幾鹹濕，有幾核突得幾核突，即使評為不雅物品都冇問題，只要到時到候毀屍滅迹就得嘞。
淫審處審裁員龔靜儀講得冇錯，佢話事件明顯係影視處執法不嚴，有足夠證據執法都冇行動，係向公眾發出錯誤訊息，變相鼓勵違法。
淫賤黎一次又一次得享特權逃離法網，仲話香港係法治之區喎，慳啲啦！