勁勁勁！東方報業集團旗艦網站《on.cc》確係醒醒醒！
點勁呀？點醒呀？功夫茶係咪賣花讚花香呀？當然唔係啦，有真實數據支持o架。根據國際互聯網市場研究公司comScore Media Metrix嘅報告，現已加入中文名稱《東方互動》嘅《on.cc》榮膺全港第一新聞網站，瀏覽人數最多。單月不重複瀏覽人數創下二百八十七萬嘅驕人紀錄，單月瀏覽頁次多達三億八千萬，你話係咪又勁又醒兼夾冇得頂！
大家可能會問，因乜解究《東方互動》可以喺眾多新聞網站之中脫穎而出呢？秘訣係乜呀？功夫茶實實在在話畀大家知，完全冇秘訣，有麝自然香。正如《東方日報》長期高踞全港銷量冠軍，全憑集團上下夙夜匪懈拚搏到底，《東方互動》之所以大受歡迎，同樣係努力換番嚟嘅回報。成日都話啦，讀者眼睛是雪亮的，唔通你做得差都有人睇咩，梗係做得好先至有知音吖嘛。
就以去年八月發生嘅菲律賓槍手屠殺香港人質為例吖，《東方互動》緊守領導香港新媒體嘅崗位，二十四小時無休止報道事態發展，創下三千萬單日嘅瀏覽頁次紀錄，以及單月不重複人數二百八十七萬嘅佳績，專業精神受到肯定。
要做到瀏覽人數最多，方便閱讀當然係不可缺少嘅一環。網站去年推出iPhone可以閱讀《東方日報》以及《太陽報》，即時新聞及智能電話嘅手機版m.on.cc，畀讀者上下班途中都能夠緊貼時事，成為手機上網必到之處。剛剛推出嘅iPad程式亦提供《東方日報》、《太陽報》及即時新聞，進一步領導新媒體廣告發展。
二○一○年世界盃舉世矚目，廣告商透過《東方互動》作為吸引新一代觀眾嘅主要途徑，成績不知幾咁理想！
係人都知家陣係網民嘅世界，點樣先至可以吸引到網民嘅注意呢？《東方互動》將新聞加入到facebook同微博等等社交網站，更切合新一代網民嘅閱讀習慣。
呢嗱嗱嗱，一講到集團旗艦網站嘅非凡捷報，真係講到停唔到口。好似獲港交所指定提供免費即時股票報價嘅《money 18》咁吖，其他財經網站喺經濟不明朗之下死氣沉沉，《money 18》就一枝獨秀，創下單月不重複瀏覽人數一百零七萬嘅新紀錄。新增功能除咗陰陽燭之外，更加全港首創《18好路數》，統計所有香港上市公司股價，提出預測，好評如潮。
至於一直都極受歡迎嘅《ontv》咯喎，去年年中以全新姿態出現，包括加入中文名稱《東方電視》，眾多嶄新設計之下，觀眾更容易透過社交網站利用短片交流，單月不重複瀏覽人數創下一百三十六萬新高，絕對係實至名歸。
記唔記得《時代》雜誌曾經選出「你」作為風雲人物？所謂「你」即係網民，既然《東方互動》榮膺全港第一新聞網站，攜手共創風雲又點少得「你」呀！