今時今日小朋友其實幾幸福o架，就以校巴為例吖，功夫茶細細個讀書嘅時候諗都冇諗過有校巴管接管送，惟有日日走去逼巴士囉。逼巴士呢家嘢，唔係講玩o架，擠迫程度絕對係針插不入，有時候連門都閂唔到。之不過咁，幸福還幸福，校巴假如冇做好監管工作，始終係會暗藏危機嘅。
本報早前報道過，有部分校巴非法加裝座位，而運輸署又好似發雞盲咁乜都睇唔到。言猶在耳，出事嘞，有小學女生慘變滾地葫蘆，牙煙到極！
件事係咁嘅，一名就讀土瓜灣獻主會小學嘅女童，上月二十日乘搭一架車身印有「學校私家小巴」嘅十六座校巴返學，女童被安排坐於靠邊嘅橫排座椅，不過座椅不設安全帶。當校巴駛至斜路燈位嘅時候，司機突然急停，女童隨即連人帶書包被拋出座位，滾呀滾，一直滾到車門位置，導致右腿膝蓋受傷。不幸之中嘅大幸就係，好彩當時車門緊閉，否則咯喎，滾出車外都唔知點算好！
關於呢一單險象環生嘅校巴事故，申訴專員公署表示關注，話會繼續留意事態發展。
點解校巴會有座椅不設安全帶嘅呢？如果有安全帶，小妹妹未必會有血光之災喎。所以就話運輸署監管不力囉，非法加裝座位吖嘛，梗係求求其其是是但但o架啦，有安全帶至奇。
咁就嚟到第二個問題嘞，校巴點解要非法加裝座位呢？要回答呢個問題其實相當複雜，一來涉及牌照制度，二來涉及燃油系統。功夫茶唔想講得太過技術性，怕悶到大家抽筋，不如化繁為簡啦。大致嘅情形係咁嘅，法例規定校巴最多只可以有十六個座位，而部分經營者會購買原本二十四至二十九個座位嘅「柴油大巴」，然後再拆到只剩十六座，而運輸署竟然又批准喎。既然大巴車身不變，僅僅由多座位拆到變咗少座位，咁咪剩低大量空間囉，於是乎咯喎，業界又會偷偷加裝座位，賺多兩個發財錢吖嘛。
即係咁，喺運輸署監管之下，乜嘢騎呢古怪嘅事情都會發生，廿幾座會變做十六座，而十六座又唔知會變做幾多座。結果就出現小學女生慘變滾地葫蘆嘅可怕經歷嘞！
唉，呢個運輸署確係抵打屁股，冇耐前之嘛，申訴專員公署主動調查該署如何監管「亡命小巴」，得出嘅結論係署方犯足五宗罪，包括遲遲冇處理好小巴安裝黑盒、安全帶以及限速器等等問題。
小巴奪命車禍多到冇朋友，唯一嘅朋友就係形同幫兇嘅運輸署。家陣輪到校巴出事，你估運輸署署長黎以德會唔會良心發現吖嗱？喂喂喂，去年開學後首兩個月，警方已經發現大約三十架學校私家小巴違法加設不穩固座位而提出檢控，未發現嘅都唔知幾多。黎署長如果繼續尸位素餐，翹埋雙手乜都唔做，校巴也亡命就該煨咯！
計功夫茶話齋，假如申訴專員公署真係關注到要再一次開足火力炮轟運輸署，不如索性改名「混帳署」冇咁嬲！