嘩嘩嘩！連幼稚園學生都上街遊行，真係冇人夠膽話香港唔係示威之都咯！
幼稚園學生人仔細細，因乜事幹拋頭露面宣洩不滿呢？有乜嘢訴求咁呀？原來又係特區政府好心做壞事，學前教育學券計劃自從○七年設立以來問題不絕，搞到「童不聊生」，所以咪變身「上街兒童」囉。
即係咁，由二十幾個團體組成嘅幼兒教育大聯盟發起遊行，三千六百名幼稚園教師、學生以及家長參加，要求政府全面資助幼兒教育，實施十五年免費教育。示威者沿途高叫口號「學券資助問題多，免費幼教勿蹉跎」。
對於教師而言，學券制最令佢哋谷鬼氣嘅係工作量增加，薪酬反而不受保障。好似入行十四年嘅姜老師咁吖，佢話：「依家學券下連薪酬都無保障，但係你又要不斷進修，好似無咗應有嘅尊嚴咁。」至於家長咯喎，當然係不滿學券資助金額無法全額抵銷學費啦，自然希望政府學似澳門咁提供十五年免費教育。
好嘞，幼稚園學生哥又點睇？大家可能會話，咪玩啦，小朋友上街遊行極其量係家長安排，佢哋可能以為示威係課外活動玩泥沙咋。實情可能如此，不過功夫茶想同大家分享一個怪現象，學券制之下嘅小朋友真係好可憐㗎。
話說現時幼稚園分開兩大陣營，第一類接受學券資助，同時又受到種種限制，譬如學費唔准加得太多；第二類不接受學券資助，不過通常以英文作為教學語言，而且學費貴得驚人。你知精甩辮嘅香港人幾咁唔執輸㗎啦，一方面希望子女學好英文以便日後入讀名校，另一方面又唔想白白浪費每年一萬四千元資助金額（下學年即將加碼至一萬六千元），竟然安排子女同時入讀兩間半日制幼稚園。
嗱嗱嗱，問你服未？九龍塘以及九龍城一帶嘅公園就經常出現咁嘅壯觀場面，中午時分有大批幼稚園學生急急腳食飯同換衫，事關要趕住去下一間學校上堂呀！
唉，學券制本來係惠民措施，點不知搞到唔湯唔水，你話係咪又好心做壞事吖？心智未成熟嘅小朋友居然迫於無奈身兼兩職，上晝返一間，下晝返另一間，你話係咪童不聊生吖？
好心教育官僚咪鬼咁孤寒啦，有人計過數，即使推行十五年免費教育，為幼稚園提供全面資助，每年只不過多花幾億元之嘛，對於坐擁幾千億財政儲備嘅政府簡直係九牛一毛。更何況，連澳門都落實十五年免費教育咯，香港有乜理由落後形勢？學似教協會長馮偉華話齋，十五年免費教育已經係全球趨勢，必須推行。
如果你問香港人點解咁抗拒生兒育女，極有可能會有人同你講，供書教學好大開支㗎，家陣幼稚園學費分分鐘貴過大學，收入微薄嘅打工仔點負擔呀！
計功夫茶話齋，幼稚園免學費方為正道，一來可以將學前教育納入正軌，二來間接鼓勵多多生兒育女。生育多，學生多，教育官僚咪唔使手執屠刀亂咁殺校囉！