等功夫茶考考大家記性先。記唔記得西班牙曾經發生過一宗嚴重到極嘅罷工事件？如果唔記得，咁就同大家溫故知新嘞。
舊年聖誕節前冇幾耐喎，西班牙嘅航空管制員忽然之間發起全國大罷工，抗議薪金縮水咁話。對於呢一個突如其來嘅野貓式舉動，莫講話西班牙嚇到鼻哥窿冇肉，全世界都驚到有得震時冇得瞓。你知啦，聖誕節係國際航空事業一大考驗，人人飛來飛去過節，萬一西班牙航空交通癱瘓，受影響嘅會係數以十萬計旅客，隨時拖累整個歐洲。結果咯喎，西班牙政府以最果斷嘅辦法結束工潮，一來出動軍方接管各大機場，二來義正詞嚴同罷工者交涉，不排除以軍法起訴唔願意復工嘅航空管制員。於是乎，西班牙機場火速回復正常，咁先至抹得一額冷汗咋。
點解要舊事重提呢？首先，功夫茶想話畀大家聽，航空管制係非常、非常、非常之咁重要，稍一差池就會係死得人多嘅空難，所以西班牙先至會緊張到出動軍方接管。其次，原來香港嘅航空管制系統十分、十分、十分之咁落後，而新建嘅民航處總部要到二○一三年先至落成運作。換言之，原來喺香港搭飛機出出入入係好牙煙㗎！
嗯，順帶一提，假如閣下立志做一個航空管制員，恭喜你，事關西班牙航空管制員年薪折合港幣二、三百萬，香港應該不遑多讓啩。
香港嘅航空管制系統落後成點呢？按照民航處處長羅崇文嘅講法，未來採用嘅新系統就係iPhone，家陣用緊嘅舊系統就係「大哥大」，水壺電話呀，老友！
事實上，由於系統太舊嘞，機場控制中心最近曾經兩度受到電台廣播嘅電波干擾。喂，航空管制嘅主要工作係指揮飛機升降，萬一機師因為受到干擾而聽唔到指令，一不小心飛機撞飛機炒埋一碟點算呀？所以話啫，航空管制系統一定要確保不受干擾，否則後果不堪設想。
民航處話喎，年初二將會係航班升降高峰期，預計當日會有九百八十六架次航班升降，好大機會打破去年最高紀錄九百七十三架次。嗱嗱嗱，破到紀錄當然值得高興啦，之不過計功夫茶話齋，升降安全先至係重中之重，萬一有乜嘢冬瓜豆腐，羅崇文處長人頭落地十次都唔夠謝罪！
即係咁，既然新總部同新系統要遲至二○一三年先落成運作，仲有兩年真空期，期間務必要打醒十二分精神，絕對唔可以有絲毫出錯。雖然大哥大水壺電話落後到唔恨啫，不過照計都應該有能力保持通話啩，只要物盡其用，未必失去聯絡。
講到尾都係小心、小心再小心，空難一次都嫌多，千祈唔好因為系統大落後而搞出人命。
不如咁啦，趁年尾流流，等功夫茶同羅崇文處長拜個早年：恭喜發財！出入平安！記住一飛沖天，慎防一落千丈！