淫賤黎旗下壹淫媒不斷宣淫販賤係人都知㗎嘞，問題係，呢個世界點解可以有人咁死性不改嘅呢？計功夫茶話齋，答案其實顯而易見，港英餘孽不斷放生吖嘛，咁咪搞到淫賤黎有恃無恐囉。打個譬喻吖，假如有人賊性不改，一次又一次打家劫舍，而差人叔叔又唔知點解一次又一次隻眼開隻眼閉，硬係唔肯維護法紀拉人收監，賊佬咪縱到膽生毛囉。
呢嗱，爛果報網站動新聞播放一段名為「大咪俾人（目及），平胸亦自信」嘅短片，尋日被淫褻物品審裁處暫定為第二類物品，亦即係不雅物品，你估影視處會唔會檢控吖嗱？功夫茶真係冇咁樂觀，事關影視處無端端放棄檢控已經唔係第一次。
冇耐前之嘛，壹淫媒旗下網站以「如何自行檢查乳房」為名，播放一套女子裸露胸部嘅短片，四分鐘片段全無打格仔處理，無遮無掩仲大特寫再加上搓揉按壓，結果被淫審處評為第二類不雅物品。哈，影視處居然話，相關網站已經修改咗警告字眼，所以唔會再採取任何檢控行動喎。
喂，根據本港法例，發放不雅物品係刑事罪行嚟㗎，初犯者最高罰款四十萬元及監禁一年，再犯者最高罰款八十萬元及監禁一年。影視處莫名其妙輕輕一句就話唔檢控，咁同差人叔叔放過賊佬有乜分別呢？有法不依等同助紂為虐，隨時荼毒青少年㗎咋！
嗱嗱嗱，你唔好同功夫茶講淫賤黎又係擁有特權嘅「法官姪女」呀，冇人信㗎。再講吖，就算真真正正嘅法官姪女Amina最終都要踎監啦，點解一而再違反法紀嘅壹淫媒會冇事嘅呢？
一次係咁，兩次係咁，其實過百次都係咁。即使影視處真係檢控，到頭來又係高高舉起、輕輕放低。唔好嫌功夫茶長氣，呢個殘酷事實不得不提，壹淫媒旗下刊物違反《淫褻及不雅物品管制條例》早就超過一百次，案底厚過電話簿，之但係所謂刑罰輕到冇人信，呢次罰款幾千，嗰次罰款幾萬，求其搵個壹淫媒小小員工都賠得起啦，何況係早就將罰款當作成本嘅淫賤黎！
香港嘅所謂法治簡直得啖笑，對於擺明車馬誨淫誨盜嘅壹淫媒完全冇阻嚇作用。睇下人哋台灣政府就唔同嘞，台灣爛果報動新聞發布不雅訊息吖嘛，台北市政府合共罰款一百萬元新台幣，雖然壹淫媒提出上訴，最後仍被台北高等行政法院裁定敗訴。一句到尾，罰得有理！
講番今次呢一段「大咪俾人（目及），平胸亦自信」嘅短片，係就係裁定不雅，可惜影視處是否檢控都未知。難怪連淫審處審裁員都批評，正因影視處執法疏懶，以致有傳媒利用灰色地帶繼續宣淫，擔心其他網上平台會藉此有樣學樣，令網上色情資訊氾濫。
城市大學專業進修學院學術統籌宋立功就講得啱嘞，佢話壹淫媒不斷刊載刺激性圖片，儼如測試淫審處嘅執法底線，相信之後仍會出現類似情況。宋立功又認為，一旦有網站違規，應該警告或處分，否則形同默許縱容。
講到縱容呢家嘢，基本上係路人皆見嘅荒謬現象，否則唔會縱出呢一個膽生毛嘅宣淫販賤急先鋒。
點都好啦，唔該影視處同淫審處奉公守法啦，唔好餐餐有法不依。家陣有人測試你哋嘅執法底線呀，等同公然挑戰官府權威，你哋唔要面啫，港人同胞要㗎！