罔顧民意硬闖關 申亞收檔咎自取

民心不可欺,民意不可違。立法會財委會尋日否決咗申辦亞運撥款申請,可以講係意料中事。港府罔顧民意倒行逆施,申亞以鬧劇收場,完全係自取其辱,與人無尤。

大家可以睇到,港府為咗申亞,無所不用其極,陰招茅招出盡。最搞笑嘅係,當局連民意調查亦做手腳,弄虛作假,報喜不報憂;高官甚至出陰招,游說反申亞政黨嘅負責人「放水」,要求部分議員特登缺席表決會議喎。唉,手法咁那渣,唔失敗至奇!

明知大勢已去,曾蔭權前日仲搏命游說議員支持,講好聽啲叫盡最後努力,講難聽啲係垂死掙扎。佢除咗玩靠嚇,話如果申亞唔成功,好難擔保之前承諾嘅改善體育設施項目可以盡快開工;仲發晒爛渣,大呻申亞過程畀人「跣」,搞到背脊都係窿咁話。

煲呔曾仲死撐,話會一鼓作氣,直到最後一分鐘都會說服議員放下成見,支持申亞。其實使乜等到最後一分鐘吖,反對申亞,民意昭昭,議員點敢逆民意而行吖。港府搞咁多嘢,最終得個吉,呢啲咪叫機關算盡太聰明,反誤了卿卿性命咯,港府自己撼頭埋牆,唔衰攞嚟衰。

其實一鼓作氣係假,一意孤行就真。申辦亞運由始至終都不得人心,當局除咗嗌幾句空泛嘅口號,根本講唔出申亞對本港整體發展有乜好處。再講,準備「功課」又甩甩漏漏,連最簡單嘅開支預算,港府嘅數字都前後矛盾,開頭就話要一百幾十億,面對輿論質疑,又改口話只需六十億元,最後又莫名其妙加到九十幾億。

預算數字咁鬼兒戲,係人都知其中有蠱惑啦。如果呢次立法會開綠燈,港府過咗海就係神仙,到時尾大不掉,整出個無底深潭出嚟要納稅人填氹,咁就該煨咯。

平心講句,香港人唔係唔支持亞運會,更加唔係唔支持運動員,但發展體育係要有長遠嘅政策,要有足夠嘅資源,唔係搞一次亞運會就得。正如有人話齋,如果當局肯將申辦亞運嘅開支用於推廣體育,支援運動員,咁樣比舉辦亞運實際得多,成效亦大得多喇。

再講,家陣本港正面對好多比申亞更迫切嘅社會同民生問題,由經濟轉型、創造就業、對抗通脹、安老扶貧等等,都需要港府集中資源同精力去處理。當局該做嘅唔去做,唯獨對申亞呢個面子工程十二分肉緊,甚至不惜背離民意,一條黑路走到底,簡直係冥頑不靈。

呢,一項有關兩岸四地消費信心調查顯示,香港人消費信心跌到兩年新低,幾乎包尾,大部分受訪者憂慮通脹惡化。煲呔曾自己都話應對通脹係當前急務喇,既然係咁,講多無謂,行動最實際,家陣申亞玩完,不如畀多啲心機,諗吓點樣為市民「救急」好過啦!