年尾流流居然出現「樓震」危機？啋，大吉利是咩，仲要過年o架，送虎迎兔呀！
灣仔大王東街有一幢四十四年樓齡嘅唐樓，三日之內兩度震呀震、震呀震，震到人心惶惶，簡直係有得震時冇得瞓。由於舊年土瓜灣馬頭圍道冧樓事件記憶猶新，所以咯喎，唐樓居民梗係一個二個變成驚弓之鳥啦，有人衝落樓避難，有人打電話報警，甚至有人悲觀到預先交代身後事。
三日兩震喎，你都咪話唔牙煙，而且嗰幢六層高嘅唐樓已經屬於年邁一族，擔心係絕對正常嘅，邊個都唔想悲劇重演。好嘞，專家有乜嘢講呢？屋宇署派人去視察過，認為大廈結構冇即時危險。屋宇署另外又話，會調查事件是否同兩條街之外嘅利東街重建工程有關。換言之，有可能地盤打樁打到累街坊。
呢嗱嗱嗱，千祈唔好怪功夫茶杞人憂天，家陣有一個問題想請教屋宇署各位老爺奶奶，你哋話大廈結構冇即時危險啫，信唔信得過㗎？即係咁，唔係話要挑戰官老爺權威，可惜官老爺經常主動失威，實在有必要多此一問。
如果大家唔明功夫茶到底講緊乜乜東東，咁就索性畫公仔畫出腸。大家都記得近一兩年不斷出現冧樹事件啦，赤柱甚至砸死一位芳華正茂嘅女大學生，荒謬嘅就係，負責管理樹木嘅政府部門餐餐都係話，檢查過㗎喇，冧樹之前冇發現有即時危險喎。
有人可能會話，冧樹還冧樹，冧樓歸冧樓，兩件事唔可以混為一談。雖然功夫茶始終覺得天下烏鴉一樣黑，做官嘅永遠都係同一鼻孔出氣，不過點都好啦，姑且唔講冧樹，淨係講番冧樓。問題係屋宇署嘅前科一樣差強人意，就好似馬頭圍道冧樓事件咁吖，事前咪又係話冇即時危險！
家陣最有嫌疑嘅樓震元兇係利東街重建地盤砰砰磅磅打樁，受影響嘅其實唔止大王東街唐樓，附近廈門街兩幢大廈亦有居民投訴樓宇牆身出現裂痕。其中一位姓王嘅住客係咁講嘅，每當地盤開工打樁都感到大廈震動，令佢非常擔心，希望當局正視問題，盡快提供協助。呢位住客仲好激動咁質問：「係咪要等到冧樓先做嘢？」
嗱，唔好話功夫茶唔提醒屋宇署，死人冧樓呢家嘢好大鑊，尤其係農曆新年期間，灣仔一帶若然有乜嘢冬瓜豆腐，署長大人跳樓都唔得掂。
咁啦，懇請各位老爺奶奶犧牲少少辦年貨逛花市嘅時間，認認真真再睇清楚灣仔樓震嘅原因到底係乜，唔好掉以輕心隨口講一句冇即時危險就算鬼數。
吖，功夫茶忽然諗起一套陳年舊片《危樓春曉》，當中吳楚帆有兩句極之經典嘅對白：人人為我，我為人人。功夫茶建議屋宇署一眾官僚搵番套片睇睇，一來感受一下危樓嘅迫切性，二來咯喎，發揮吳楚帆利人利己嘅精神，唔好餐餐自私自利自己顧自己，漠視百姓死活係天理不容o架！