失業率持續高企，每逢有招聘會例牌逼爆，尤其請公務員，更加係次次都打崩頭，所以咯喎，如果政府飛行服務隊話要請直升機見習機師，睇怕應徵者冇一千都有幾百人。
政府新聞網尋日上載咗兩位女機師嘅專訪短片，強調直升機師嘅工作女性亦可以勝任，希望有多啲女同事加入咁話。
短片開頭先講威水史，話參與搜救行動嘅女機師全世界寥寥可數，英國皇家空軍有兩位，愛爾蘭有一位，而本港飛行服務隊就出咗兩位。跟住又介紹其中一位女機師點巴閉法，話佢曾創下飛行服務隊首次成功進行公路搜救嘅紀錄。吹咗一大輪，其實無非都係想話畀大家知，「飛行服務隊正招聘飛行員」。
公務員係鐵飯碗，薪高糧準福利好，仲可以學到飛行技術，咁筍嘅工去邊度搵？仲唔快趣去應徵？不過，如果你真係想去應徵，咁你就太傻太天真嘞，原來飛行服務隊上次公開招聘見習機師已係舊年六月，今次只係限公務員申請嘅內部招聘。唔怪得人哋話，政府靠得住，豬乸會上樹啦。
政府新聞處拍呢段招聘宣傳片，搵靚女機師做生招牌，但公務員招聘網同飛行服務隊網頁招聘欄目，完全冇刊載內部招聘嘅資訊，究竟係佢哋擺烏龍，定係故意愚弄市民，只有佢哋自己先至知。正如有立法會議員話齋，如果有市民睇咗短片去求職至發現原來唔係公開招聘，好似「被玩」咁，唔就假。見微知著，政府行政混亂，處事兒戲，由此可見一斑。
話時話，如果私人廣告商擺咗咁大嘅烏龍，早就畀人要求回水啦，弊在涉及呢單無頭公案嘅係兩個政府部門，點樣烏龍都好，一於少理，宣傳短片照出可也。
唉，喺夕陽政府心態下，部門之間各自為政，多一事不如少一事，官員做嘢好似遊魂咁，渾渾噩噩，得過且過，做一日和尚撞一日鐘，類似醜聞大家都睇到慣晒咯。
講開又講，由於各部門缺乏溝通，浪費公帑嘅醜聞不絕於耳，最典型例子莫過於教育局花公帑租番自己地嗰單嘞。申訴專員舊年踢爆，地政總署前身新界民政署三十幾年前應當時嘅教育司署要求，撥出一幅千幾平方米嘅土地畀某體育協會興建活動中心。身為地主嘅教育司署用部分土地擺放器材，居然「唔記得」業權屬於自己，累到後來嘅教育局多年嚟無端端支付一百八十萬元租金。業主糊裏糊塗變租客，你話呢啲官係咪冇靈魂吖！
古人話齋，其身不正，雖令不從。成個政府由上至下都冇晒靈魂，連煲呔曾都畀人叫「離岸特首」，下屬仲唔有樣學樣咩。所以話，政府新聞處及飛行服務隊今次係擺烏龍又好，靠害市民又好，濕濕碎喇！