神醫何其多，身邊總有一兩個。有聽過食綠豆能醫百病嗎？有聽過食雪條可以治癌乎？唔好以為功夫茶新年流流噏得就噏，能人輩出嘅神州大地通街都係呢種古靈精怪嘅神醫。至於香港咯喎，茅山師傅會同無知婦孺咁樣講，嗱，你同我上床作法啦，包你龍精虎猛，有病治病，無病強身，改運又得，驅魔都得，得咗！
正常嚟講，有病就梗係睇醫生啦，之不過香港嘅公立醫院好鬼死激氣㗎，輪候時間超乎人類忍耐極限，短則一年半載，長則三五七年。即係咁，你最好趁年輕力壯冇病冇痛嘅時候預先排隊，否則當到你病到五顏六色，你未必有咁長命等到醫生睇囉。
就以公立醫院輪候白內障手術為例，你估要等幾耐吖嗱？平均時間係二十六個月呀，唔等到死都等到盲啦！
正正由於白內障病人多達五萬名，一個二個迫於無奈等呀等，咁就益咗神醫出動搵食嘞。有一個自稱退休老中醫嘅伯伯話喎，鑑於治療時間漫長兼且費用昂貴，所以獨門自製神奇眼藥水專治白內障，只須係咁意滴幾滴，一分鐘之內白內障就可以自動消失㗎嘞。呢位伯伯話已經醫好幾十個白內障病人，費用仲相當便宜益街坊添，一隻眼三百銀，兩隻眼六百蚊，誓神劈願保證不成功不收費。
大家係咪覺得幾滴眼藥水能夠治療白內障太不可思議？呢啲就係英雄所見略同嘞，冇錯，實在難以置信，功夫茶都係咁諗。根據正牌眼科醫生所講，手術係根治白內障嘅唯一方法，從未聽過眼藥水有效治療。
唉，講來講去又係香港嘅公營醫療系統累人不淺。政府唔肯增加資源吖嘛，醫院服務求過於供吖嘛，病人一諗到排隊要排兩年零兩個月，係咪好容易就會心思思幫襯神醫呀？你估個個都係財爺曾俊華咩，人哋一話心臟病發啫，醫護人員第一時間撲出搶救，草民百姓冇咁好招呼㗎，有命你就等啦，冇命都要再等，等嘅係有錢都未必買得到嘅骨灰龕。
衞生署話喎，聲稱眼藥水能醫白內障嘅伯伯唔係註冊中醫或表列中醫，佢哋會跟進。計功夫茶話齋，跟進梗係要跟進啦，之但係治標不治本係唔夠嘅，衞生署最好向老頂食衞局局長周一嶽提議，增撥資源處理好白內障手術，咁先至係解決問題嘅徹底辦法。
話時話，醫療資源錯配之下，你估有幾多種手術要望穿秋水先至成功求診吖嗱？確實數據功夫茶真係唔知，淨係知道經常有血癌病人等到死都未有機會做手術。功夫茶思疑，假如有神醫聲稱賣一粒老泥畀你當藥食可以治療血癌，或者都會有人心甘情願博一鋪。
好心周一鑊諗諗辦法啦，公院求診等呀等，造就神醫搵銀，係咪想香港變身神醫中心呀！