即使大家冇做過獵人，睇戲都睇過獵人係點樣捕捉獵物o架啦。即係咁，除咗拉弓射箭之外，最通常嘅做法係搵一個籠，放啲食物入去做餌，譬如你想捉兔仔，咁咪放蘿蔔囉。好嘞，等兔仔一走入去食蘿蔔，咁就淪為籠中獵物o架喇。
功夫茶因乜事幹講打獵？無他嘅，事關食環署同控煙辦夾手夾腳玩陰濕，整個陷阱埋伏煙民，等佢哋一個唔覺意誤墮法網，無可奈何高歌一曲：這陷阱，這陷阱，偏我遇上！
即係咁，香港晨早有禁煙條例o架啦，而禁煙嘅涵蓋範圍亦已經擴大至公共運輸交匯處以及巴士總站，相關法例實施已經超過一年。照道理嚟講，禁煙範圍之內梗係冇可能會有煙灰缸o架啦，即使係食環署擺放嘅垃圾桶亦都唔會有煙蒂箱。好嘞，假設你係煙民，忽然之間見到一個附設煙蒂箱嘅垃圾桶，你會點做呢？毫無疑問你會假定身處嘅地方唔係禁煙區，本能反應就係理直氣壯行過去，以俗稱「打邊爐」嘅方式圍住個垃圾桶起勢煲煙，煲呀煲，煲呀煲，直至煲到上足電為止。而根據電影情節，煲煙期間話唔定可以發生一段戀情。
荒謬嘅情況出現嘞，港鐵葵芳站嘅巴士總站欄杆設有煙蒂箱，有人親眼目擊，煙民打邊爐期間忽然殺出控煙辦職員，二話不說即刻話佢哋違反禁煙條例，一個二個就地正法。
呢嗱嗱嗱，你話係咪獵人捕捉獵物嘅陷阱吖？巴士總站明明係禁煙區，之但係又有煙蒂箱喎，擺明就係裝你無知煙民嘅彈弓，等你煲煙煲得咁過癮吖嗱。之不過咁，香港始終係一個法治之區，煙民變做籠中獵物之後係唔會放上砧板拆骨起肉落油鑊嘅，所謂就地正法只不過係票控罰款咁解。亦即係話，煙民誤墮法網嘅代價係淪為官老爺嘅提款機，食環署同控煙辦出糧靠晒你哋喇，多謝多謝。
唔好以為只有葵芳港鐵站先至有陷阱呀，原來荃灣愉景新城巴士總站一樣有人裝彈弓。計功夫茶話齋，奉勸各位煙民以後最好步步為營，以做賊嘅心態行事就冇走雞嘞，見到煙灰缸千祈唔好頭腦發熱一嘢衝過去，左望望，右望望，確定冇人會跳出嚟將你繩之以法，先至好吞雲吐霧。
其實呢，香港成套禁煙條例真係搵笨夾多餘，搞咁多花臣做乜呢？假如功夫茶係食衞局局長周一嶽，肯定會一聲令下將香煙列作毒品，吸煙當吸毒辦，冇眼屎乾淨盲。
大家試想想，乜鬼孔雀石綠呀，乜鬼致癌物質呀，只要發現極少量已經鬼殺咁嘈第一時間回收，既然吸煙又話陽痿又話致命，點解唔全面禁售先？家陣嘅禁煙條例絕對係偽君子嘅偽善行為，准你買煙，唔准食煙，先抽你稅，再罰你款，間唔中又整個請君入甕嘅陷阱你歎。煙民啊煙民，你的名字是水魚！
點都好啦，官老爺搵笨還搵笨，煙民都有人權o架，麻煩收起所有禁煙區裏面嘅煙灰缸，唔好引人犯罪吖嘛，否則煙民怒吼「還我免被冤屈的人權」就肉鬼酸啦！