香港警察濫用職權時有所聞，到底濫到乜嘢程度呢？等功夫茶同大家講一個古仔，聽落都真係幾恐怖㗎。
○八年十二月十三日凌晨，有一位叫做麥偉文嘅男子，同朋友喺油麻地廟街附近消夜，不小心將熱茶倒落朋友身上，搞到對方手忙腳亂跌落地。麥偉文隨即道歉並且企圖執起跌翻咗嘅櫈，就喺呢個時候，幾個衝鋒隊警員出現，以為佢執起張櫈係要打人，於是喝令佢唔好輕舉妄動。既然發生誤會，自然引起口角，哈，威風凜凜嘅差人叔叔竟然將麥偉文武力制服，然後抬上衝鋒車送去油蔴地警署。
去到警署嘞，大感不滿嘅麥偉文再同警員發生口角，期間被粗口怒罵以及推跌地上，跟住獨立扣押過夜。第二日，警方批准保釋，經過多次報到之後，○九年七月二日麥偉文得到通知，警方決定不起訴，可以取回五百元保釋金。
古仔講到呢度，功夫茶同大家做一個小結，成件事嘅起因根本就係芝麻綠豆咁瑣碎，搞到又拉又鎖實在小題大做。
好嘞，警方話決定不起訴吖嘛，麥偉文咪走去投訴警察課投訴遭受警員暴力對待囉，日子係○九年七月二十三日。
跟住落嚟，去到○九年八月，麥偉文同朋友消遣期間有人醉酒鬧事，警方將所有在場人士帶返油蔴地警署。戲劇性發展出現嘞，警方居然話喎，要加控佢上次被捕時襲警。咁即係乜嘢意思？意思即係話，你去投訴警察課投訴吖嘛，咁咪翻你舊帳囉。再講得白啲，有人玩報復。
你知啦，襲警罪可大可小，貴為法官姪女就話有機會甩身啫，無權無勢嘅平民百姓隨時坐監喎。好彩，案件於去年五月喺九龍城裁判法院審理，法官認為警員作供未能詳細交代襲警詳情，內容空泛，判被告無罪釋放。案件最離奇嘅係，有人涉嫌冒簽聲明書。另外，麥偉文被控刑事毀壞嘅案件亦因證據不足而撤銷。
嗱嗱嗱，你話呢個古仔係咪恐怖吖？開頭唔告你，後來一聽到你話投訴就告你襲警，告都算嘞，點不知所謂證據不盡不實。即係咁，一個麥偉文叫做大步檻過，第二個麥偉文有可能身陷冤獄。
計功夫茶話齋，好心香港警察唔好愈來愈似內地公安啦。偉大祖國最為人詬病嘅就係司法不公，你一話投訴邊個邊個啫，官老爺手起刀落即刻將你打入黑牢，最經典例子就係毒奶粉受害家長趙連海，含冤受屈被判以尋釁滋事罪入獄兩年半。話就話保外就醫，實際上唔知去咗邊。
有冇聽過「井水不犯河水」呀？其實，對於香港警察嚟講最貼切嘅係「井水不扮河水」，差人叔叔千祈唔好公安上身，破壞一國兩制㗎！
總而言之，功夫茶衷心希望以後唔會再有襲警案，眾目睽睽被摑一巴好瘀皮啫，同時亦希望以後唔會再有屈人襲警案。請記住，濫權屈人犯眾怒，冇人想警方名譽掃地啩！