近日一段「中學生公園上禮對晨運婆婆公公，打成一片」嘅短片喺網上熱播，睇過嘅市民對短片入面幾個中學生嘅言行舉止都感到震驚同憤怒。做出小人所為仲當自己係君子，欺凌長者不以為恥，反以為榮，香港啲後生仔點解會變成咁嘅？
短片所見，一個初中男生不停出言指摘一個喺公園晨運嘅婆婆，跟手又對住鏡頭做出勝利手勢，每次成功激嬲婆婆就拍晒手掌，旁邊多個少男少女一面狂笑，一面吶喊助威。婆婆同一起嚟嘅公公離開之後，男生自己噏一大輪之後仲問身邊朋友：「知唔知咩叫君子動口不動手呀？」
本報記者搵到呢個「君子男」，佢話成件事起因係佢朋友用水潑濕咗公園嘅石春路，婆婆見到斥責佢哋「破壞公物」，雙方發生爭執，於是有咗上面嗰幕。「君子男」話已感到歉疚，一連幾日都喺公園等呢對公公婆婆，希望親口講聲對唔住喎。
唔少網民不滿男生咄咄逼人嘅態度，同佢班朋友嘅嬉皮笑臉。有青少年問題專家指，事件反映青少年嘅價值觀有偏差，令公眾反感。講真，呢個同學事後知錯，亦準備對婆婆表達歉意，已經算難得嘞。查實，比呢班細路更離譜更惡教嘅，通街都係。
本港青少年問題近年愈來愈嚴重，校園濫藥、網絡欺凌、援交等等不良行為，已經成為學校同家長嘅噩夢。最大問題係，青少年冇正確嘅價值觀，是非不分，良莠不辨。
今年暑假前有調查發現，為咗搵快錢，多達三成受訪高小及初中學生接受為幾百蚊酬勞去「賣老翻」或「運送不知名物品」。為咗錢乜都肯做，乜都夠膽做，問你驚未。
近年童黨燒屍案、童黨風化案、學生打老師等惡性事件令人觸目驚心，顯示家庭教育失敗、學校教育失效，亦反映港府對問題未有足夠重視，更冇全面同有效嘅青少年政策。
貧富懸殊愈來愈嚴重，家庭同樂已經成奢侈品。家長為搵食，對子女疏於管教；經濟入不敷出，家暴數字不斷上升，倫常悲劇更時有所聞。缺乏溫暖親情嘅病態家庭，點保障下一代心智正常成長？
學校係教書育人嘅地方，應該教學生做人嘅道理，但資源不足，教師只顧「授業」，冇時間「傳道」，學生難以形成正確嘅人生觀。最攞命就係，教育政策近年變化無常，基準進修、語言微調、新高中學制等，令教師工作量大增，難以處理愈來愈複雜嘅校園問題。連教師都不堪壓力要自殺，同學仔有問題仲可以搵邊個？
教育下一代家長有責，學校有責，全社會都有責，但政府責任最大。教改愈改愈亂，青少年失業率屢創新高，當局束手無策。返學無所適從，畢業等於失業，睇唔到前途，青少年咪惟有自暴自棄囉。
一代文豪梁啟超話過「少年智則國智，少年富則國富，少年強則國強」。青少年代表香港未來，計功夫茶話齋，如果佢哋失去希望，香港就永無希望。保障下一代健康成長，政府責無旁貸！