醉駕撞死人嘅內地官二代一句「我爸是李剛」驚天地泣鬼神，反映權貴子弟二世祖係幾咁欺人太甚。大家估下香港嘅法官姪女Amina當日眾目睽睽之下掌摑警員嘅時候，心裏面有冇諗過「我叔是法官」吖嗱？當然啦，冇人知道大小姐當時諗緊乜，不過以鏡頭所見嘅身體語言判斷，「我叔是法官」就未必嘞，My Uncle Is a Judge斷估走唔甩，畢竟呢位嚴重公主病患者應該不屑講中文，事發期間聽得最多嘅一句係I Want To Leave。
既然同樣係恃勢凌人嘅港版官二代，前科纍纍嘅Amina即使干犯第三次襲警罪，得到叔叔嘅同事法外開恩輕輕放過自然係吹佢唔脹嘅事，唔係乜嘢叫做特權先？理得你平民百姓鬼殺咁嘈，即使由律政司出面要求覆核，法官大人依然故我維持原判，硬係唔將呢一個襲警嘅刁蠻港女收監法辦，淨係話感化一年喎。
事件發展到尋日，終於有一個大快人心嘅轉變。東區裁判法院裁定，Amina違反七項感化令之中五項條款，判處即時入獄六星期，不准保釋等候上訴，必須獄中過聖誕。
呢嗱嗱嗱，咁先至叫做似樣吖嘛，襲警明明係大罪，而且係積犯所為，咁都唔使坐監簡直冇天理啦，難怪早已引起全城公憤。無權無勢嘅你試下走去摑警員一巴吖，莫講話洗定八月十五等踎監，有冇命離開警署都成問題。
話時話，有一點值得大家留意，今次嘅判決唔係上訴結果，純粹係東區裁判法院根據原審法官阮偉明嘅感化令裁決，因為Amina違反感化令所以掟佢入監倉。真真正正由律政司提出嘅上訴要明年一月先至開審，點樣判未知㗎，有機會係將已經監禁過六星期嘅Amina再一次掟入監倉，亦都有可能故技重施輕輕放過。亦即係話，大家不妨拭目以待，睇睇明年嘅上訴結果會唔會又激起民憤。
計功夫茶話齋，淨係一個港版官二代受到法律制裁係唔夠㗎，放眼香港你估仲有幾多權貴逍遙法外吖嗱？過往例子不勝枚舉啦，高官偷竊又冇事，法官個仔藏毒又冇事，警察濫權以放蛇為名享受嫖妓服務咩？當然又係冇事啦！
所以話啫，聖公會大主教鄺保羅發表嘅聖誕文告講得冇錯，香港的而且確瀰漫「仇富人、怨權貴」嘅情緒。鬼叫你為富不仁咩，鬼叫你包庇權貴咩，鬼叫你財大氣粗嘅二世祖個個都係「我爸是李剛」，普羅大眾只可以寒寒酸酸咁話「我爸是窮鬼」，唔仇唔怨就奇怪咯！
鄺保羅另外又呼籲世人唔好「賺到盡、食到底」，「有風不可駛盡」。講就係咁講啦，特權階級聽唔聽真係唔知，只要仍然有官老爺撐腰，官二代、富二代以至於官商勾結千秋萬代，肯定會繼續橫行霸道。
總而言之，一個法官姪女收監唔代表香港法治守得雲開見月明。如果你繼續為富不仁、包庇權貴，功夫茶第一個仇怨你！