豹出沒注意！豹出沒注意！小心小心！
唔知係巧合定係乜嘢，印度北部啱啱先至話野豹為患，導致七人受傷，香港同樣發生聞所未聞嘅「豹患」。之但係，此豹不同彼豹，香港呢一隻豹其實係曉飛嘅直升機，大寶號叫做「超級美洲豹」咁解啫。
尋日朝早喎，一架機齡九年嘅政府飛行服務隊超級美洲豹直升機喺城門水塘取水灌救山火期間，懷疑二號引擎突然故障，機身搖擺不定。好彩機長臨危不亂，第一時間卸水減重，然後當機立斷急降水塘，不惜淪為「落水豹」，機上三人游水上岸幸保不失，送院檢查證實冇穿冇爛。
話就話超級美洲豹擁有兩個引擎，理論上死咗一個引擎仍然可以依靠另一個引擎繼續飛行，機長呢一個急降行為始終值得肯定，畢竟人命關天，萬一冒險飛行而造成空難，後果確係不堪設想，假如稍一不慎撞落民居，更加係害人害物害街坊。
哈，講開又講，今年七月先至有另一單類似個案，有一架來往香港同澳門嘅直升機亦係由於機件失靈而急降維港海面。唔通今次機長決定落水自救係受到前人啟發？點都好啦，兩次急降水面都冇造成人命傷亡，兩個機長值得一讚。
之不過又咁喎，功夫茶想問一問飛行服務隊，平時嘅維修保養有冇做好呀？如果有做好，因乜事幹會引擎故障㗎？超級美洲豹最重要嘅作用係救人，有乜可能自身難保㗎？功夫茶奉勸一句，飛行服務隊千祈唔好學消防處，救人工具難自救，醜都醜死啦！
係呀，消防處真係醜死怪㗎，又殘又舊嘅老爺救護車不斷死火，新買嘅救護車又英雄無用武之地。前一排本報先至揭發，消防處買車之前原來冇考慮適合香港道路使用嘅大小尺寸，首兩批抵港嘅七十多架新車比舊款白車高出三十厘米，無法通過限高三米嘅通道。至於車身嘅闊度，新車又比舊車多十厘米，連沙田救護站正門亦無法進出。
至於講到救護車平時嘅維修咯喎，簡直係荒天下之大謬。負責維修嘅係機電工程署，可惜手工差到冇朋友，連法官大人都睇唔過眼，建議消防處「換車房」。即係咁，白車問題一日未解決，救死扶傷仍然存在風險，延誤救治害死人就大鑊！
同樣道理，既然飛行服務隊嘅神聖任務係救人，點可以容許直升機死火嘅呢？假設有人行山不慎受傷，直升機接載途中忽然又話引擎故障，急降水塘仲好少少，若然急降咗去唔知邊處深山野嶺，搵又難搵，救又難救，弊一弊都冇咁弊！
計功夫茶話齋，既然民航處已經成立專責小組調查出事原因，唔該順便責成飛行服務隊切切實實做好維修保養，絕對不容許胡亂瞎搞。今次就話有一個當機立斷嘅機長啫，下次未必咁好彩喎，美洲豹變殺人豹就該煨咯！