一間屋最大嘅敵人係邊個？假如唔係學似中國官場最流行嘅暴力拆遷，或者學似馬頭圍道舊樓成座倒塌，正常而言一間屋最大嘅敵人係水。
火當然都可怕啦，之但係你唔會日日見到火燭吖嘛。至於水咯喎，打風落雨又有，樓上滲漏又有，一個唔覺意塞爆坑渠仲大劑。所以話啫，裝修師傅會同你講，一間屋最緊要做好防水防漏，否則你一擲千金豪裝到美輪美奐都係浪費彈藥。
既然水對於居住環境有咁大影響，政府處理滲水投訴事宜係咪應該打醒十二分精神呀？唉，講出嚟睇怕未必有人信，屋宇署與食環署轄下有一個俗稱「滲水辦」嘅聯合辦事處，名義上幫小市民主持公道，實際上完全係做戲咁做，搞來搞去一大餐之後佢哋話喎，由於員工離職，所以擱置跟進。
係呀，你冇眼花睇錯呀，滲水辦真係咁講㗎，係咪荒謬絕倫到難以置信呢？旺角甘芳街有一個姓劉嘅不幸業主，幾年前開始單位天花出現滲漏，而且有惡化迹象，○九年十月忍無可忍就向滲水辦投訴啦。滲水辦經過測試之後終於證實滲水源頭係上層單位。既然實牙實齒有證有據，咁就梗係提出檢控討個公道啦。正當劉先生以為一天都光晒嘅時候，滲水辦居然同佢講，唔好意思，當初負責嘅兩名員工離職嘞，佢哋唔會出庭作證，因為定罪機會太低，所以唔會提出檢控。
呢嗱嗱嗱，難怪申訴專員公署一次又一次炮轟滲水辦效率不濟㗎。功夫茶想問問滲水辦一眾官老爺，乜檢控唔係靠物證嘅咩？點解冇人證就放棄檢控？再講吖，法庭可以傳召證人作供嘅啫，員工劈炮唔撈大晒咩！
計功夫茶話齋，滲水辦十居其九係搵藉口，目的純粹係懶得就懶。係人都知冇一間公司或者機構會因為某個員工離職而無法運作，當初冇咗一個堂堂特首董建華，特區政府都照舊開工啦，你又唔見公務員因為咁而冇糧出？你又唔見政府部門例如屋宇署同食環署執笠大吉？
咦咦咦，咪住先，功夫茶忽然之間諗起一單舊案。九龍太子道西有幢加多利大廈，住二樓嘅鄔女士○六年十月發現樓上滲水，多次向滲水辦投訴，雖然測試證實滲水源頭係上層單位，不過樓上業主睬你都傻，完全當滲水辦冇到。後來揭發，滲水元兇居然係退休高官，唔理樓下死活嘅係屋宇署前署長蔡宇略。
本來呢，功夫茶覺得最有問題嗰個係蔡宇略，退咗休都仲要擺官威，家陣諗番轉頭，滲水辦一樣有問題。喂，員工離職都話撤銷檢控，一見到自己嘅過氣上司，仲唔即刻扮盲咩！
仲有一家嘢好荒謬，過去三年滲水辦平均每年接獲超過二萬宗投訴，由接獲投訴至成功證實滲水源頭平均需時一百六十八天，即係長達半年。大佬，半年先至證實滲水源頭，到頭來隨時又話員工離職而擱置跟進，死得啦！
不如咁嘞，滲水辦上上下下集體離職，咁咪唔使浪費公帑養懶蟲囉！