隧道話加就加　市民任人魚肉

通脹升溫，柴米油鹽樣樣加，隧道公司亦加埋一份，為加價潮火上添油，認真贈興咯。小數怕長計，隧道公司輪流加價，其中大欖隧道加幅更高達一成，影響非同小可，尤其係搵食車司機，簡直係雪上加霜。

話時話，私營隧道有例可依，有恃無恐，話加就加，冇人吹得佢哋脹。要怪只能怪政府無能，眼白白睇住市民任人魚肉，乜都做唔到。不過咁，隧道公司賺錢還賺錢，但都唔可以太過分㗎，竭澤而漁，遲早大家都冇得食嘅咋。

講起大老山隧道，加價就不甘後人，但公司管理就認真麻麻，負責領航嘅巡邏車居然「帶頭犯法」，令人嘆為觀止。件事係咁嘅，大老山隧道每日凌晨都會實施單管雙程行車，將其中一條管道封閉，方便進行維修保養同清潔。封管之前，隧道公司會派巡邏車行頭，引導其他車輛，不過咁，如果你以為跟住巡邏車行就萬事大吉，咁你就太天真太傻咯。

呢，有駕駛人士曾跟住隧道公司嘅巡邏車行駛，點知巡邏車突然飆前，加速到八、九十公里，比法例規定嘅五十公里時速快咗幾乎一倍，最後連影都唔見埋。如果其他駕駛人士唔留意隧道車速限制，跟住巡邏車照衝可也，被控超速事小，發生意外事大，真係愈諗愈牙煙。

隧道公司聲稱會檢控涉事巡邏車司機，將個案交法庭處理，但巡邏車「帶頭犯法」，隧道安全存在咁大漏洞，明顯係管理出咗問題喇，咁隧道公司又點解釋呢？

講番隧道加價呢一筆吖，簡直係輪流搶錢，八月份西隧加，聖誕日大老山隧道加，元旦日輪到大欖隧道接力，仲有吖，東隧仲離譜，申請明年加價四成，問你死未！

私營隧道申請加價，理由都離唔開為股東取得合理回報，講白啲即係「未賺夠」。而港府次次都係束手無策，任由隧道公司飛擒大咬，話就話按本子辦事，實際上根本係無王管。

最典型就係東、西兩條過海隧道，紅隧長期嚴重塞車，係人都知道原因出在東隧同西隧收費太貴，問題根源係當局當年同隧道公司簽咗「不平等條約」，自廢武功，根本無法否決東西兩隧加價申請。所以咯喎，唯一可行嘅辦法就係回購兩條隧道，一了百了。

可惜，當局話就話唔排除回購，實際上一拖再拖，更以顧問公司建議做擋箭牌，提出「紅加東減」方案嚟敷衍民意，簡直不知所謂。

古人話齋，揚湯止沸，莫若去薪。任由私營隧道話加就加，唔止增加市民負擔，令通脹惡化，更會引發社會爭拗不斷，問題唔解決，民怨遲早爆煲，試問政府仲要拖到幾時？