搞創科空有口惠 守財奴葉公好龍

尋日大學教育資助委員會轄下嘅「檢討研究政策及資助專責小組」發表報告，小組主席徐立之第N次苦口婆心，點醒呢個踢極唔郁嘅政府。佢話香港喺科研嘅資源投放比其他地區少得可憐，容易令人才流失，政府除咗要增加投放經費，仲要做多啲嘢，等研究成果可以轉化成生產用途，唔好一味停留喺學術層面，無法變錢。佢仲塞錢入港府袋，話家陣粵港澳大灣區發展如火如荼，港府係醒目嘅就借東風啦。

唔該官老爺豎起耳仔聽清楚啦，搞科研唔係齋靠吹水，亦唔係求其掟舊錢出嚟就關人個關，最緊要仲係識得穿針引線，等科研成果可以轉換成賣錢項目。愈嚟愈多港產科技人才轉戰深圳，講到尾都係因為搵唔到食，與其嘥心機捱眼瞓，點解唔北上「中國硅谷」大展拳腳？有辦你睇，當年喺香港科技大學讀書、研發無人機嘅汪滔，最終都係喺深圳至有用武之地，仲殺入埋福布斯中國四十歲以下富豪榜添。

點解香港留唔住科技人才？最簡單一樣嘢，港產官僚一個二個都係科技盲，貴為特首居然夠膽死連八達通都唔識用，學人講發展創新科技，人唔笑狗都吠。號稱「內行」嘅創科局局長楊偉雄都唔好得幾多，實際幾多料冇人知，最大成就係見過Steve Jobs就係人都知。前排施政報告話撥款五百億推創科，楊偉雄居然嫌少，話一千億都唔夠。咪話功夫茶玩踢爆，佢老哥開天索價，無非睇死老細唔會批，第時衰咗都有得賴；所以話，港產官僚個個都係葉公好龍，總之多做多錯，唔做唔錯，成個官場充斥住「做一日和尚敲一日鐘」嘅心態，旨意班廢官謀劃長遠，蚊都瞓蛇都死。

咁就唔怪得香港喺發展創科方面唔夠人爭喇。德國總理默克爾之前訪華，點名要去深圳參觀，默大媽點解唔順路過埋條羅湖橋，過嚟香港望兩眼呀？鬼咩，香港咁多年嚟經濟四大支柱冇變過，一味金融、地產炒來炒去，有咩好睇啫。其實唔止港官對創新科技冇興趣，普羅大眾都一樣提唔起勁，淨係睇吓電子支付搞極都搞唔起，就知道香港人對創新科技態度幾咁守舊。

大家見到啦，港府唔單止冇神經、冇靈魂，仲要冇眼光、冇承擔、冇熱誠，學者們就算講到口水乾都係對牛彈琴嘅咋。香港喺庸官把持下，想唔被周邊地區拋離都難，真係諗起都一殼眼淚。