行李艙門也失靈 國泰出醜無極限

呢，尋日旅遊達人項明生喺社交網站上載短片，原來佢喺香港機場等咗粒幾鐘都未攞到行李，搞到忍唔住要炮轟國泰，佢係咁講嘅：「唔鬧佢唔得，佢哋話行李門開唔到，搵人手搞緊，我唔知點解搵人手搞，搞咗個幾鐘頭都未搞掂。行李拎唔番，大家坐晒喺地下，勁無奈囉。坐咗十幾個鐘頭機，攰到死，諗住返屋企沖吓涼。連空姐都投訴，冇得返屋企。」項明生仲同本報呻，等行李嗰陣見到有職員向機師同外籍旅客派水，但就無派畀本地乘客同空姐，疑似「大細超」。無獨有偶，國泰姊妹公司港龍亦都有一班由布吉飛香港嘅航班延誤十九粒鐘，打亂晒旅客行程，又唔肯賠償，有冇再衰啲吖。

話時話，國泰真係不思進取，早前至試過因為貨艙機門閂唔埋，搞到二百幾個乘客要換機，話口未完，今次就輪到行李艙門開唔到，搞到乘客落咗機都冇得走，都咪話唔荒謬。連項明生都話搭過超過一百間航空公司嘅飛機，遇到咁嘅事都係第一次，仲要「搵人手搞」，令人難以置信，以為坐嘅係古代飛機。咁又係呀，舊年有港商因為國泰機內廁所鎖頭失靈，被困五十分鐘，證明事故五花八門，層出不窮，畀你估到嘅就唔係國泰啦。

大家有眼見，國泰對飛機維修保養馬虎，只有想不到，沒有做不到。有區議員月初搭國泰，就因為背墊突然滑落，搞到雙膝大力撞向前方椅背，事後懷疑膝頭軟組織受損，呢位區議員就向國泰報告座位問題，希望唔好再有人中招，點知國泰慌死要佢賠償咁款，一句「運作正常」就關人個關，擺明卸責，爭在未鬧番個客多事咋，嗰副店大欺客嘅嘴臉，真係冇乜人頂得順囉。

講開國泰店大欺客，真係數三日三夜都數唔完，之前仲試過有國泰職員擺出一副事不關己嘅不禮貌態度，辣㷫另一位專欄作家。今次行李艙門開唔到，連空姐空少都玩埋，齊齊有家歸不得，都好嘅，咁咪等佢哋感受吓「大細超」式嘅款待，被人當透明嘅滋味囉，話唔埋係上帝都睇唔過眼佢哋店大欺客，要佢哋自己受番啦。

所以話呢，國泰雖然係百年老店，但管理不善，服務愈來愈唔掂，艙門壞、廁所壞、座位壞，呢啲只係前戲，最怕有一鋪終於搞到機毀人亡，邊個孭得起呀！