天時暑熱，有咩節目好得過去游水吖？如果你有興致，天未光就落水嘅話，仲可以順便睇埋日出添，既健康又浪漫，一舉兩得。不過咁，好多泳灘朝早八點至有救生員當值，碧波暢泳隨時樂極生悲，安全毫無保障，真係要自求多福！
即係咁，好多長者鍾意約埋三五知己游早水，唔少人清晨相約包車前往，弊在救生員冇咁早返工，一旦遇溺咯喎，往往叫天不應叫地不聞，隨時搞出人命。呢，○九年四月之嘛，一位八旬老婦到西貢清水灣游早水遇溺，雖然有泳客見義勇為合力將佢救起，但老婦送院後已返魂乏術。游水變搵命博，好唔值得啫。
好嘞，五年眨吓眼過去，情況有冇改善呢？本報記者返現場睇過，發現晨泳客依舊要喺冇救生員當值下冒險落水，險象環生。難怪有老友記慨嘆，萬一出事只能守望相助，各安天命啦。
老實講，要防止類似悲劇重演，話都冇咁易，問題係當局肯唔肯做嘢啫。正如拯溺員工會代表表示，如果交通安排許可，救生員其實唔介意返早啲，最緊要喺泳客安全同救生員利益之間搵到平衡點，而工會早喺○四年已主動向康文署提出相關建議。可惜吖，言者諄諄，聽者藐藐，康文署一句資源不足，就關人個關，乜都唔做。人哋就話意見接受，態度照舊啫，康文署直頭睬你都嫌費事，問你服未。
真係諗極都唔明，之前就話救生員工會要求增加人手，甚至不惜發起工業行動逼政府就範啫，家陣救生員都肯走多一步，只要當局喺編排人手方面靈活啲，咪一天都光晒囉。退一步講，即使現有救生員人手不足，大可以喺清晨時段請兼職救生員，新增開支照計唔會太多，點解康文署咁簡單嘅嘢都唔肯做呢？
所以話，所謂資源不足，純粹藉口嚟嘅啫。大家有眼見，港府開新位益自己友，濫用福利搵着數嘅時候，幾時考慮過資源問題吖？計功夫茶話齋，佢哋係抱住多做多錯，唔做唔錯嘅心態就真。其實群眾眼睛係雪亮嘅，只要取之於民，用之於民，公帑用得其所，就算適當請多幾個救生員，市民又點會有意見吖。
都係孟夫子講得啱︰「挾泰山以超北海，語人曰，我不能，是誠不能也；為長者折枝，語人曰，我不能，是不為也，非不能也。」延長救生員當值時間，簡直易過折枝，康文署闊佬懶理，關人個關，唔通真係要等到再搞出人命至肯補鑊！