年年歲歲花相似，歲歲年年人不同。每年七一，有人慶回歸，有人大遊行，而港府就忙於授勳分餅仔，簡直係各有各亂。嗱，今年遊行人數就創咗多年新高喇，而港府分餅仔又點呢？即係咁，今年受勳人數雖然冇舊年咁多，但一樣係龍蛇混雜，烏煙瘴氣。
話說今年有八十幾人獲委任為官守及非官守太平紳士，呢啲太公分豬肉嘅遊戲，大家本來已見怪不怪，不過由於當中有人身份特殊，所以惹起政商界議論紛紛。呢個人就係曾任全國政協委員嘅富商姚志勝，據講佢曾捲入當年嘅廈門遠華走私案，已銷聲匿迹多年，連政協銜頭都被內地搣走，直到近年先至再次活躍於中港政商界，今年仲獲委任為太平紳士添，問你服未。正如政界人士話齋，獲委為太平紳士，有無功勞仲係其次，最緊要身家清白。
冇錯嘞，太平紳士係港英時代遺留落嚟嘅產物，一向係身份嘅象徵，獲委任嘅人唔係德高望重，就係社會賢達，職責包括協助維持社會秩序、防止非法刑罰、處理簡單法律程序等，幾乎等於暫委法官，身家唔清白又點能夠勝任呢？唔怪得今年授勳名單一出，即時引起各界嘩然喇。
其實，港府將授勳當成政治酬庸，搞到濫竽充數，荷蘭水蓋大貶值，呢啲笑話已經唔係第一次嘅喇。好似華潤集團前董事長兼黨委書記宋林咁吖，去年七一先至獲港府委任為太平紳士，點知相隔幾個月就因為涉嫌違紀而被內地免職調查，簡直係鬧劇。
正如本報日前踢爆，回歸後愈來愈多中資高層以及擁有人大政協等內地官方職銜嘅權貴獲港府頒贈荷蘭水蓋，導致授勳名單「一片紅」，共產黨員成為港產太平紳士，令人嘆為觀止。呢啲內地權貴一來未必居於香港，二來未必係香港居民，既談不上對香港有歸屬感，更說不上對香港有幾大貢獻，當局究竟根據乜嘢準則委任，完全係黑箱作業，市民根本一無所知。而內地權貴之所以對港產荷蘭水蓋趨之若鶩，無非認為喺江湖行走，想多個銜頭照住，卒之咪搞到笑話百出囉，最怕有人為求目的，不擇手段，咁仲大件事吖。
講到底，授勳制度之所以淪為太公分豬肉，多得前朝貪曾政府唔少。貪曾一人得道，「曾朋友」雞犬升天，連以「三點不露」而臭名遠播嘅李國寶都獲頒最高殊榮大紫荊，佢兩個仔年紀輕輕亦先後獲委任為太平紳士，你話嘞，佢哋究竟何德何能吖？有人話內地政協藏污納垢，其實港府授勳亦唔好得去邊，最多係五十步笑一百步嘅咋！