喺港府打擊店舖阻街嘅宣傳片裏面，可以見到貨物通街亂擺，幾乎無路可行，搞到市民要求商舖高抬貴手，「畀條路行吓」。大家咪以為做戲咁做吖，現實當中真係咁，店舖阻街，七國咁亂，港產官僚互相卸膊，執法不力，市民有乜法子唔「走投無路」吖。
嗱，申訴專員公署尋日發表報告，指店舖阻街問題嚴重，全港有四十五個黑點，遍及港島東區、九龍深水埗以至新界西貢，梗有一個喺左近。究竟點樣阻街呢？咁就各顯神通咯，有啲喺行人路上擺賣，有啲索性喺行人路設櫃台貨架，有街市攤檔直頭當正行人路係「陳列室」，擺放貨物嘅面積仲大過店舖本身，問你服未？你知啦，香港路窄人多，互相碰撞引發爭執事小，人車爭路釀成交通意外事大，唔係講玩！
店舖阻街問題之所以愈來愈嚴重，首先係當局執法懶懶閒，罰則冇阻嚇力。目前食環署主要採取「先警告、後檢控」嘅執法方式，好多檔主會先收起貨物，等執法人員行開，立即故態復萌；再講吖，署方每年檢控唔夠七百宗，大部分罰幾百元了事，有啲甚至五十元有交易，簡直係變相鼓勵阻街。
除咗執法不力，部門互相卸責，你推我讓，亦係另一個主要原因。申訴專員公署係咁講嘅，食環署、地政總署及屋宇署等執法部門各自為政，各部門傾向矮化自己角色，減少採取執法行動嘅積極性。「矮化」呢個詞的確可圈可點，不妨想像如下場景︰接到阻街投訴後，食環署同地政總署講︰「你哋英明神武，應該由你哋出手。」而地政總署就同屋宇署講︰「你哋人強馬壯，執法非你哋莫屬。」大家謙讓一番，最終各有各卸，關人個關。
港府話就話就店舖阻街問題諮詢公眾，食物及衞生局局長高永文更加係拍晒心口，稱會聯同十八區加強執法，講就好聽嘞，最終成效係點，好難令人樂觀囉。事關港產官僚胡混度日，得過且過，店舖阻街問題只係一個縮影咋。最經典嘅例子，莫過於幾年前有人投訴將軍澳通街晾衫問題嚴重，多個政府部門居然闊佬懶理，冇人肯執法，結果要由時任政務司司長嘅貪曾統籌處理，簡直係笑話。
正所謂，三個和尚冇水飲。特別係今時今日社會泛政治化，官僚喺多做多錯、唔做唔錯嘅心態下，互相扯皮已經成為官場痼疾，旨意佢哋負責任喎，蚊都瞓蛇都死喇。
不過咁，食環署打擊店舖阻街就懶懶閒啫，但對付普通小販又唔同喇，簡直如狼似虎，勢兇夾狠。試諗吓，如果佢哋拎出一半決心處理店舖阻街問題，使乜搞到市民冇碇企吖！