潮流興節約，連內地都大力反對鋪張浪費，反對形式主義，反而以高效廉潔自詡嘅港產官僚居然背道而馳，排場有咁大搞到咁大，有咁鋪張搞到咁鋪張，令人嘆為觀止。
嗱，講緊嘅咪就係提早退休嘅消防處處長陳楚鑫囉。係人都知，陳楚鑫庸碌無能，管理混亂，導致消防處屢爆醜聞，劣迹斑斑，仲被審計署大數十宗罪添。正因為咁，佢被迫提早執包袱，稍有廉恥嘅都應該夾住尾巴低調走人喇，偏偏佢面皮夠厚，居然勞師動眾大搞「退休騷」，簡直醜態百出。
即係咁，退休騷喺沙田消防局舉行，節目就豐富咯，包括學員步操、模擬救火表演等等，動員近百名消防員，班高層就笑到見牙唔見眼，難為班消防員喺雷暴警告之下冒雨表演，搞到怨聲載道，直斥管理層為咗討好新舊處長，罔顧員工安全，直情係收買人命。
咁都唔止吖，為接待來賓，小瀝源消防局變身臨時停車場，消防員淪為斟茶遞水嘅「阿四」，既要為嘉賓擔遮，又要代客泊車，睇見都好笑。正如「東方報業民意調查」顯示，四成九受訪者直斥「退休騷」勞民傷財，浪費人力物力；兩成五批評擦鞋文化嚴重；一成八指消防救火變做騷。
講開又講吖，消防處擦鞋文化其來有自，每逢處長退休，唔係搞歡送大龍鳳，就係大排筵席，阿諛奉承，肉麻當有趣。同樣係紀律部隊，警隊、入境處、海關同懲教署從來唔興呢一套，唯獨消防處樂此不疲，唔知嘅仲以為佢哋高人一等添。正如監察政府組織話齋，呢啲根本係長官意志多於實際需要，萬一其他部門有樣學樣，咁仲成世界嘅！
所以話，上有好者，下必甚焉。近年消防處醜聞纏身，唔係被踢爆酬酢開支大增，就係無理打壓傳媒，甚至連消防設備都頻頻入錯貨，鑊鑊新鮮鑊鑊甘。難怪上述民調顯示，四成五受訪者直斥消防處浪費公帑亂使錢；三成批評消防處烏煙瘴氣；兩成認為亂象叢生，延誤救援。
正所謂，廟小妖風大，池淺王八多。區區消防處長嘅退休騷，排場幾乎比國家領導人仲誇張，究竟知唔知個醜字點寫o架？古時候清官離任，百姓爭相贈送萬民傘以示感謝，傘愈多，愈有面；後來貪官有樣學樣，亦要求百姓送萬民傘，以裝點門面。既然陳楚鑫死要面咯喎，不如照辦煮碗要求消防員送萬民傘吖笨，咁豈不是更有創意更有面？怕只怕，陳楚鑫自己知自己事，就算有萬民傘，佢都未必夠膽收喇，係咪！