狗咬人唔係新聞，人咬狗至係新聞。而喺香港，基建工程超支唔係新聞，唔超支至係新聞。嗱，港鐵工程延誤兼超支，大家早就見怪不怪，估唔到十畫未有一撇嘅機場第三條跑道亦傳出漲價逾五成，簡直匪夷所思。
件事係咁嘅，興建第三條跑道原本預算用一千三百幾億元，依家環評報告仲未出爐，已有消息指工程預算超過二千億元，成本好似火箭飆升咁，令人嘆為觀止。咁都未算吖，所謂高處未算高，第三條跑道爭議多多，唔知幾時至可以動工，再拖多幾年咯喎，睇怕二千億都唔夠埋單添吖！
巧婦難為無米之炊，為咗填補呢個無底深潭，聽講當局計劃透過加費提升機場收入，例如向每位離境旅客徵收一百元、增加飛機升降及停泊費等，預計八年內可以帶來額外三百幾億元收入喎。條數就係咁計喇，問題係為咗增加區區收入而損害香港形象及競爭力，甚至可能趕客，豈不是因小失大，弄巧反拙？再講喇，第三條跑道超支咁嚴重，就算向旅客開刀都唔夠，最後咪又係由納稅人埋單。
講起真係好笑，機管局二○一一年底公布諮詢結果，聲稱七成幾民意支持興建第三條跑道，港府隨後亦正式拍板興建，點知眨吓眼過咗兩年幾，依家連環評報告都未見，反而造價一路飆升，同當初嘅預算差天共地，你話係咪奇怪吖？雖然話港產官僚例牌估錯數啫，但都冇理由錯得咁離譜？唔通真係為求過關而故意低估成本？
正如有人話齋，基建樣樣超支，呢度幾百億，嗰度百幾億，港府識印銀紙都唔掂喇。早前本報統計過，近八年來嘅大型基建工程，總共超支一千一百幾億，如果加上港鐵五條新支線齊齊延誤，超支總額更加得人驚。講到底，基建淪為無底深潭，皆因港府效率低劣累事。當局聲稱再唔興建第三條跑道，最遲二○二二年機場客貨運量飽和，航空發展將會停滯不前喎。道理係人都知，弊在港產官僚議而不決，決而不行，而且第三條跑道爭議多多，阻力重重，究竟幾時至可以正式動工，睇怕只能望天打卦。呢，有環保團體話明一定會抗爭到底，隨時好似港珠澳大橋咁出現司法覆核，仲有排搞吖。
其實，香港係咪真係需要興建第三條跑道，社會出現好多唔同聲音，如果當局唔能夠釋除公眾疑慮，講乜都係假。依家講緊二千幾億元喎，唔係小數目吖，萬一因為好大喜功或者規劃不當而淪為大白象，咁就累人累物喇。