港府施政無能，醜聞纏身，早就唔係新聞，而作為監察政府嘅立法會其實亦唔好得幾多，一樣官官相護，公私不分嘅咋。呢，立法會政府帳目委員會就盛事基金嘅糊塗帳發表調查報告，話就話批評當局監管不力，但就放生相關人等，擺明又係高高舉起，輕輕放下。
話說早前審計署踢爆盛事基金管理混亂，帳目不清，淪為私相授受嘅分豬肉平台。立法會政府帳目委員會煞有介事進行聆訊，尋日出爐嘅調查報告直指商務及經濟發展局同埋轄下嘅旅遊事務署監管不周，難辭其咎，委員會對此表示「極度遺憾」。報告仲話，盛事基金自○九年成立以來，評審委員會主席一直冇換過人，而七名非政府成員亦只有一位係新成員，根本無助基金物色新盛事；最離譜嘅係，基金秘書處六名成員全無會計師背景，未能向評委會提供足夠支援，促請當局盡快落實審計署建議，作出改善措施喎。
表面上，調查報告對各方面都作出批評，好似十分公正嚴明咁，實際上，係人都睇得出根本係避重就輕，小罵大幫忙。嗱，就以盛事基金贊助最多、問題亦係最多嘅香港龍獅節嚟講，既被指瞞報利益，又被質疑作大就業人數，甚至連用剩嘅錢都拒絕歸還，簡直亂七八糟，但報告竟然提都唔提，對擔任龍獅節籌委會召集人嘅立法會議員連少少責備都冇，你話唔係放生自己友，細路仔都唔信喇。
仲有吖，既然報告批評盛事基金評委會主席多年來由同一人擔任，以致了無新意，即係話評委會主席失職喇，但報告同樣係語焉不詳，你話奇唔奇吖。當然喇，如果大家知道擔任評委會主席嘅又係立法會議員，咁就唔會覺得奇怪咯，自己人查自己人，做騷咁做，點會查出乜嘢結果吖。
所以話，立法會畀人叫「垃圾會」，真係冇冤枉o架。盛事基金嘅糊塗帳就好似照妖鏡咁，既照出政府胡混度日，更照出政客自私自利。最荒謬嘅係，涉事議員仲喺度死雞撐飯蓋，指盛事基金要求申請者提供招聘及薪酬紀錄等條件「不合理」，自己毋須負上責任喎。唉，靠呢啲九唔搭八、不知所謂嘅政客監察政府，真係蚊都瞓蛇都死，唔怪得搞到香港七國咁亂喇！
正所謂，沒有最醜，只有更醜。盛事基金冇盛事，臭事瘀事一大籮，有人稱之為醜事基金，簡直一語中的。計功夫茶話齋，獻醜不如藏拙，盛事基金臭不可聞，與其繼續嘥時間檢討，不如及早摺埋，慳番啲公帑好過。今日香港已經烏煙瘴氣，無謂再添煩添亂喇！