笑看天下:選民無知鑄國家悲劇

特朗普嘅支持者喺首都華盛頓示威,更一度闖入國會大樓,導致5人死亡,多人受傷。事件引起公憤,一眾曾表明撐特朗普嘅共和黨議員即時轉軚,不再挑戰選舉結果,終由副總統彭斯宣布,確認拜登當選下任美國總統。特朗普臨卸任被指煽動暴力,遭受史無前例嘅炮轟,前總統奧巴馬指佢令國家蒙羞及丟臉!

特朗普玩火自焚,正應了本報所指的「天道輪迴,報應不爽」!特朗普肯定已成為美國歷史上最糟糕嘅總統,必會被釘在美國歷史嘅恥辱柱上!明明大勢已去,佢仍發聲明指完全不同意大選結果!睇到民眾對佢嘅抨擊排山倒海而來,對佢煽動暴力破壞美國民主、撕裂國家的行為,炮轟得體無完膚,特朗普才死死氣話會在1月20日「有序轉移權力」,但一切已經太遲了!

據報內閣官員正討論援引憲法第25修正案罷免佢,亦有國會議員要提出彈劾並罷免佢,但啟動彈劾程序恐怕時間唔夠,不過點講都好,由此可見特朗普已眾叛親離,臨下台已變神枱貓屎!

想起特朗普不斷叫嚷要讓美國再次偉大,又永不言敗,揚言4年後再戰江湖,要再次令美國偉大起來,如今佢自身難保,一切更成為笑話!老朽又諗起早前挪威一名國會議員提名特朗普角逐諾貝爾和平獎,指佢在以阿和平進程中居功至偉!特朗普嘅道德人格崩壞至此,在國外竟也有盲目粉絲,都幾鬼好笑;而在國內更有眾多盲目擁戴者,難怪鑄成今趟嘅「國家悲劇」!

美國第35任總統約翰‧甘迺迪有句名言:在民主制度裏,一位選民的無知會危及所有人的安全!佢嘅說話,今朝都到眼前來!證諸美國,證諸香港,一脈相通!特朗普抗疫不力,美國至今確診及死亡人數均世界第一!而且佢喺總統任內,據悉單係「高爾夫球之旅」已花費國家逾億美元,這樣的總統還值得撐嗎?