香港地大型基建延誤超支，可以講係家常便飯，之不過「未動工，先超支」，仲要比原本預算超出一倍有多，大家又聽過未？市民未見官先打三十大板，認真冤枉！
立法會交通事務委員會尋日討論將軍澳跨灣連接路工程撥款，該工程預計今年下半年動工，二○二二年完工，點知有立法會議員踢爆，原來行會早於一四年已經批准動工，拖足三年幾至上立法會，預算更加由原本嘅廿二億元，「三級跳」增加至依家嘅五十六億元，簡直離晒大譜！
次次基建延誤，港府都係賴反對派政客拉布阻頭阻勢。班政棍係又拉唔係又拉，連民生工程都唔放過，冇錯係神憎鬼厭。之但係今次有啲唔同，港府自己大歎慢板，結果授人以柄，與人無尤。最好笑嘅係，港府坐擁金山銀山，錢多到冇碇使，寧願將「倉底貨」地區工程拎番出嚟檢討，都唔肯還富於民。計功夫茶話齋，官老爺與其做埋晒啲唔等使嘢，倒不如花心機做實事，最起碼都幫吓將軍澳居民免受塞車之苦吖。
咁造價估算飆升一倍幾，官老爺又點解畫？佢哋話喎，工程需時進行詳細設計同埋海底探土，又話當年估算嘅廿二億港元造價，並未包括海底探土以及現時嘅拱橋式高架橋設計。喂，連最基本嘅探土同建造方法都冇腹稿，所謂「估算」，基本上即係山草藥──噏得就噏，官字兩個口，乜都係佢哋講晒。
不過大家慣嘅嘞，人哋就「辦法總比困難多」，港產官僚就「藉口總比辦法多」。港珠澳大橋人工島工程一延再延，路政署官僚居然夠膽死話受機場高度限制掣肘，唔知嘅仲以為香港又試起新機場。至於廣深港高鐵香港段進度滯後，當局歸咎於黑雨影響進度，更加係經典中嘅經典。
市民家陣冇嘢驚，最驚係五十六億嘅報價只係「前菜」。大家有眼見，政府問立法會攞錢，奉旨有報少冇報多，一來成本估少啲，變相將來回報率更加可觀，成盤數都靚仔好多；二來「請君入甕」之後再不斷要求立法會追加撥款，到其時洗濕咗個頭，打死狗講價，唔怕對方唔就範。除咗港珠澳大橋同高鐵，沙中線、西九文化區等大型基建，無一例外淪為公共財政黑洞，淨係一條高鐵，平均每公里造價已經破晒世界紀錄，就係咁解。
本來呢，只要用得其所，錢使多啲都無可厚非，問題係時間唔等人，以港珠澳大橋為例，前前後後講咗幾十年，講到依家香港物流業畀周邊地區追過都仲未起好，結果咪自己玩死自己囉。
特衰政府就係咁嘅嘞，善財難捨，冤枉甘心，市民血汗錢與其任由得呢班廢官亂揈，不如直接分咗佢冇咁嬲！