樹大有枯枝，族大有乞兒。好似台灣《自由時報》咁，老作新聞成家常便飯唔在講，為報私怨甚至可以連最基本嘅新聞道德都劈埋一邊，冇查證就妄評本報報道「捕風捉影」，咁就難怪被台灣同行封為「媒體之恥」喇。
講真，《自由時報》嘅報道手法喺台灣有口皆悲，被控告被罰款被判刑嘅案件多不勝數，有興趣嘅讀者不妨參考本報有關報道。功夫茶今日想同大家探討嘅，反而係呢份台獨媒體嘅獨特邏輯思維。該報引述東方嘅報道內容，係話中共最高層決定打掉逃亡海外內地富豪郭文貴嘅保護傘，既然有關消息係「捕風捉影」，咁係咪即係話北京投鼠忌器，買咗貪腐集團嘅怕呢？
郭文貴最近喺海外頻頻爆料，係真係假，大家自有判斷，不過如果有人試圖用呢種方法要挾北京停止追捕，恐怕係一廂情願。用膝頭哥諗吓都知道，第五代上場反貪腐手起刀落，連周永康、薄熙來呢啲頂級大老虎都難逃牢獄之災，其他貪腐集團又點可能心存僥倖？本報報道出街後唔單止冇人否認，外界仲反應熱烈，足以證明有關報道有根有據，合情合理。
《自由時報》認為大陸當局要剷除郭文貴背後保護傘係「捕風捉影」，除咗係以小人之心度君子之腹，更可能有難言之隱。內地近年來腐敗盛行，官商勾結愈演愈烈，至於郭文貴呢位問題富豪主要靠炒地皮發達，少不免梗係依附權力，前國安部副部長馬建、前河北省政法委書記張越、前保監會主席項俊波，就被指係佢嘅後台嘞。
有咁啱得咁蹺，人稱「台獨地下司令」嘅台灣聯邦集團、《自由時報》創辦人林榮三，據報道亦係炒賣地皮出身，更被揭發借政界關係洞悉先機，藉此賺取數以十億元計新台幣。崩口人忌崩口碗，大家都被指係「官商勾結」嘅典型，你估吓有冇人「物傷其類」而藉機發作吖嗱？
成件事真係愈講愈奇怪，《自由時報》逢中必反，最叻就係鬧大陸腐敗，好嘞，家陣大陸強力打貪，上順天意，下應人心，照計政治立場係點都好，都應該樂觀其成，點知《自由時報》一個屈尾十，居然批評有關反腐敗嘅報道「捕風捉影」，神又係佢鬼又係佢；香港嘅壹淫媒亦唔執輸，之前鬧內地無官不貪，不知幾過癮，依家不惜為被通緝嘅郭文貴提供輿論陣地，「獨媒」亂搬龍門兼夾是非混淆，黑白不分，真係唔到你唔服。
所以話，反中播獨唔單止禍國殃民，更加危害健康，好似《自由時報》同壹淫媒咁走火入魔，同燒壞腦冇乜分別嘅咋！