沒有最離譜，只有更離譜，美國聯合航空侮辱華裔乘客陶大衞嘅醜聞好似打開潘朵拉魔盒咁，臭史愈揭愈多。一名患有腦性麻痹嘅殘障乘客就自爆曾經因為等唔到輪椅，最後無奈之下惟有爬落飛機，側邊嘅空中服務員竟然冷眼旁觀，簡直令人心寒！
想知咩叫冇心冇肺，睇吓呢間公司就得嘞。舊年之嘛，全美國咁多間航空公司，造成最多旅客寵物死傷嘅就係聯合航空，九隻寵物慘成「機上亡魂」，而且差唔多次次出事後都關人個關，唔係將責任推得一乾二淨，就係求其退番機票錢了事，真係唔到你唔服。
醜聞發生至今差唔多一個禮拜，航空公司至今連合理解釋都冇，行政總裁呢頭為辱客醜聞道歉，嗰頭發內部電郵反咬個客「好勇鬥狠」，力撐員工跟足指引，跟手副總裁又否認有政策逼乘客落機，真係神又係佢哋，鬼又係佢哋。
唔好以為淨係聯合航空醜聞多多，其他航空公司都係一擔擔，而且好多時都專揀亞裔乘客嚟恰。一名七十五歲南韓籍牧師日前入稟法院，控告美國航空種族歧視，佢話自己明明買咗機票並持有有效登機證，點知機組人員係都唔畀佢上機，相反排喺後面嘅白人乘客就可以掂行掂過。值得留意嘅係，呢位韓籍牧師正正係因為陶大衞事件至決定追究到底，成個美國航空業界仲有幾多種族歧視醜聞尚未曝光，真係冇人話得埋。
咪睇美國佬開口埋口人權自由，人人生而平等，現實係好似《動物農莊》咁，有啲動物比另一啲動物更平等，特別係狂人特朗普上台之後，「白人至上」主義者好似攞正牌歧視咁，最近有網上預約民宿屋主講到明因為住客係亞洲人而拒絕招待，就係最佳例子。前排有電視台走落紐約唐人街採訪，一時問人識唔識空手道，一時問人隻錶係咪偷番嚟，極盡侮辱之能事。鬼咩，電視台試吓換轉去哈林黑人區玩嘢吖，對方一定同你死過，甚至分分鐘暴動收場，所以咪杮子揀軟嘅捏囉。
最過分嘅係，美國佬永遠都係寬以律己，嚴以待人，有口話人冇口話自己，年年炮製所謂「國別人權報告」，對其他國家說三道四。《聖經》裏面「看見你弟兄眼中有刺，卻不想自己眼中有樑木」嘅金句，講緊咪係呢班偽善嘅美國佬囉。
始終都係嗰句︰人必自侮而後人侮之，人必自重而後人重之。華人想保護自己，最好都係學似陶大衞咁，實行用法律維權。當然喇，今時今日中國大國崛起，家陣眼見炎黃子孫畀人踩到上心口，冇理由翹埋雙手食花生啫，吓話？