以前啲人祝福老人家興講「福壽雙全」，時移勢易，人口老化，「長壽危機」先至係最迫切問題。冇計喇，依家二、三十歲啱啱出嚟社會做事嘅後生仔女，閒閒哋活過百歲，應付四、五十年退休生活，唔閉翳就呃你嘅。
特別係香港地打工仔，捱生捱死供半世強積金，最終得雞碎咁少，點搣過世吖。港府最近批准按揭證券公司推出終身年金計劃，聲稱可以幫長者將儲蓄轉化為穩定、長期、可靠同具吸引力嘅定期回報。主其事嘅財政司司長陳茂波呢排落足嘴頭，除咗強調回報率高過通脹，尋日仲寫網誌話爭取明年中推出首批產品，反應理想嘅話會考慮添食喎。
講到好似曉飛咁，但實情又係點呢？計劃最低入場門檻係五萬元，最高一百萬元，以投保最高一百萬元計，男性每月可取得約五千八百元固定年金，而女士每月就可獲五千三百元年金。以今日人均預期壽命嚟計，帳面上要回本似乎唔難，問題係每月「長糧」最多得嗰六千蚊，衣食住行百物騰貴，唔係好見使嘅咋，如果計埋通脹影響，廿幾三十年後嘅六千蚊，更加可能縮水到連基本生活開支都應付唔到。仲有吖，攞得一百萬元投保嘅，肯定唔係等住呢筆錢開飯，再唔係自己另外有層樓揸手，點都叫做有番啲環境；反觀以五萬元入場嘅長者，每個月得嗰兩、三舊水，難聽啲講句，真係買生果都唔夠吖！
古語有云︰不患寡而患不均，不患貧而患不安。香港地退休制度美其名為長者提供唔同「選擇」，但幾乎全部都係向有錢人傾斜，無論係早兩年推出嘅「銀色債券」又好，「富貴長者屋」抑或「安老按揭計劃」都好，統統同最需要幫助嘅基層長者無關，何止不均，直頭係不公不義添喇。
難為高官開口埋口「老有所養」、「老有所依」，全民退休保障討論多年，九成民意支持，港府一味玩拖字訣，對於有人提議僱主、僱員、政府三方供款，同樣耍手擰頭。好嘞，依家推出所謂「終身年金計劃」，市民出雞，港府又係連豉油都唔肯出。正因為港府涼薄成性，視長者如包袱，今時今日香港地七老八十仲要揸的士甚至執紙皮維生嘅大有人在，你話官老爺知唔知個「醜」字點寫？
好多人唔明，港府坐擁金山銀山，淨係財政儲備都成九千億元，點解係都要對老人家斤斤計較？早排有高官鬼拍後尾枕，原來財政儲備中有四千幾億元預留作公務員退休金之用。咁即係點，即係官老爺咬長糧大過天，小市民你死你賤囉。港府「殘民以自肥」，唔怪得民怨沸騰，施政舉步維艱喇！