高鐵香港段路程短過人，造價貴過人，向有「黃金高鐵」之稱。其實比起西九文化區嗰條「黃金天橋」，只係小巫見大巫咋！
唔係吹水o架。話說港府計劃向立法會申請撥款四十三億八千萬元，以推展西九文化區綜合地庫及基礎建設工程第一期，點知原來魔鬼藏喺細節中，其中一段長約六十九米、橫跨柯士甸道藝術廣場嘅行人天橋，造價竟然高達三億五千萬元，維起上嚟每米要使成五百萬元，而高鐵每米都只不過係三百萬元，你都咪話唔誇張！
有立法會議員就講得啱嘞，大拿拿五百萬元，夠買一個住宅單位。條天橋既冇自動行人通道，又冇冷氣設備，橫睇掂睇都唔值三億幾啦，吓話？
官老爺又點解畫？佢哋話喎，設計天橋遇到唔少挑戰同困難，又要跨越另一條行車天橋，離地面又成十五米高，建造時中間又唔可以擺放支架，強調造價合理唔算貴。喂，唔好恰市民唔識工程嘅嘢至得o架！如果「黃金天橋」真係物有所值，唔該官老爺列舉其他類似情況，而造價又差唔多嘅天橋喇！退一萬步講，即使真係要使咁多錢，但天橋接駁鄰近商場，帶旺該區人流，有乜理由建造到日常營運再到維修保養政府一條龍包晒吖？總而言之，呢壇嘢疑點重重，到底係有關部門亂揈公帑，抑或好似有人質疑咁，存在官商勾結，利益輸送，絕對唔可以輕輕放過。
正所謂不近情者多藏奸，係人都知，西九文化區已經淪為公共財政嘅黑洞，港府早年向立法會申請嘅二百多億元撥款，家陣已經用到七七八八，包含大劇院等主要設施、亦係整個西九文化區靈魂所在嘅第三期分分鐘無以為繼，港府洗濕咗個頭，騎虎難下，再向立法會攞錢仲難過登天，繼續向西九管理局輸血咩，長久亦唔係辦法。會唔會有人將錯就錯，諗到「借刀殺人」嘅屎橋，用擺明唔合理嘅天價起條天橋，主動送彈藥畀反對派，到時成個project拉倒咯喎，港府咪有得賴囉。
話時話，香港出名係「文化沙漠」，打造世界級文化中心本身已經先天不足，加上港府所託非人，一味迷信洋和尚會唸經，結果前後三任鬼佬行政總裁一蟹不如一蟹，成事不足敗事有餘，諗住搞個西九故宮文化博物館地盡其用喇，又因為港府諮詢做漏招搞到滿城風雨。西九文化區去到今日咁嘅田地，真係醫番都嘥藥費。
所以話啫，冇咁大個頭唔好戴咁大頂帽。港產官僚飲紅酒貪小便宜就叻，搞文化邊係佢哋嗰瓣吖。計功夫茶話齋，西九呢笪市區靚地與其養蚊，不如改建成公園，等市民有多個休憩去處都好吖。