文憑試年年甩轆 廢官僚玩殘考生

開講有話︰一命二運三風水,四積陰德五讀書。好似尋日文憑試考中文聆聽咁,同學們就算準備得幾充足都好,如果咁啱得咁蹺被安排到使用紅外線系統嘅試場,恐怕只能怨自己時運不濟嘞。

話說尋日朝臨近開考,多個試場竟然無法如常播放考核內容,要臨時改用電腦播放,部分試場延誤長達半小時,受影響考生多達一萬人。唔少考生反映,無法從紅外線耳機接收播放內容;亦有試場話一度聯絡唔上考評局,搞咗一大輪至獲手機短訊通知用電腦播放考核內容,總之就一鍋粥係啦。

嗱,話就話只係遲咗開考,實際作答時間冇少到,但你知喇,莘莘學子十幾年寒窗苦讀,文憑試「一試定生死」,食粥食飯就睇呢一鋪,畀佢咁窒一窒道中氣,分分鐘影響信心同表現,萬一最終成績受影響,條數問邊個追?好嘞,咁考評局又點解釋呢?佢哋話喎,涉事試場使用USB記憶體以及考評局提供嘅USB播放機播放聆聽考試錄音,由於喺複製聆聽考試USB時,誤以「wav」格式燒錄錄音檔案,以致未能以USB播放機播放喎。

講開又講,紅外線播放考卷實行差唔多十年,照計考評局經驗豐富,絕對唔應該出現咁低級嘅錯誤,可惜現實啱啱相反,文憑試聆聽年年考試年年甩轆,唔係接收不良就係雜音仲大過電視機雪花聲,甚至夠膽死四十五分鐘嘅考卷,一半時間出現疊聲,今次只係延遲開考,都算係不幸中之大幸咯。

講起上嚟都幾諷刺,會考聆聽播帶嘅「原始」時代,考生淨係帶個人去就得,一直相安無事,之後轉用電台廣播開始問題叢生,正因為好多考生投訴接收太差,當局花咗一大舊錢引入紅外線系統,結果甩轆多過食飯唔在講,淨係考生自備嘅耳筒,市面最常用、有三個絕緣環嘅手機耳筒原來唔啱用,有考生唔知頭唔知路,帶錯耳筒應考,導致未能接駁到試場提供嘅接收器,搞到一褲都係,考評局班官老爺愈幫愈忙,愈搞愈亂,簡直吹脹。

一葉落知天下秋,聆聽考試嘅蝦碌場面,其實只係文憑試亂象嘅縮影,試題騎呢錯漏百出都算嘞,連引入文言範文都舉棋不定,一時取消,一時復考,師生家長無所適從之餘,學生語文水平仲不斷插水。最離譜都係TSA,明明搞到天怒人怨,竟然因為政治原因,改過個名繼續死而不僵,你話係咪誤人子弟吖!

大家見到啦,回歸二十年,教育政策朝令夕改,班高官將學生家長當白老鼠咁舞,自己就一個屈尾十送晒啲仔女出國,市民唔怨氣沖天至奇!