開講有話︰肉包子打狗，一去無回頭。好似部分航空公司咁，掠水就至耍家，要佢哋回饋顧客喎，真係發夢都冇咁早！
話說機管局現時向香港機場離境旅客收取四十五元機場旅客保安費，並由航空公司代收，但包括國泰及港龍在內嘅幾十間航空公司，以國際航空協會為會員航空公司訂下收費機制，機票銀碼一律以十蚊整數計算為由，四捨五入收客人五十大元。航空公司將差價靜靜雞袋袋平安，直至早排旅行社商會去信機管局反映，加上本報報道後公眾強烈關注，機管局終於肯做嘢，要求下個月起簽發嘅機票，明碼實價列明收四十五元，預料數以百萬計旅客直接受惠。
咪以為區區五蚊濕濕碎吖，業界估計自○二年開徵機場保安費至今，航空公司總共多收近三億元，都咪話唔和味。佢哋多收嘅時候梗係笑騎騎，到依家被要求回水，一個二個你眼望我眼當冇事發生。講真，消費者唔係話緊張嗰十元八塊，而係唔抵得部分航空公司側側膊唔多覺，有着數舔到盡，吃相太乞人憎咁解啫。
唔係冤枉佢哋o架。大家估吓多收錢嘅問題最後點解決？原來一字咁淺，只需要喺旅行社訂票嘅全球分銷系統稍作改動，將機場保安費撥入以一元為整數單位計算嘅「稅項欄」就掂。舉手之勞都拖足十幾年，係要傳媒鬧爆顧客反彈至急急補鑊，你話唔係有人博大霧喎，三歲細路都唔信喇。
冇計喇，有啲航空公司一味慳得就慳，服務質素好似王小二過年咁，一年不如一年，早就有口皆悲，神憎鬼厭。好似曾被譽為「香港人航空公司」嘅國泰咁吖，雖然未去到美國聯合航空咁不堪，call警察打到旅客爆缸，但超賣機票情況有過之而無不及，搞到旅客失晒預算，怨聲載道。最過分嘅係，為咗cut budget，國泰甚至連機艙深層清潔嘅次數，都夠膽死由兩星期一次減至三至四星期一次，機艙衞生咁基本嘅嘢都可以犧牲，一個大吉利是傳播疾病，到時盞因小失大嘅咋。
講到機場保安費，航空公司當旅客水魚咁撳，予取予求，固然畀人鬧爆，機場方面收錢唔做嘢，同樣係爭唔落。大家有眼見，機場保安近年漏洞百出，帶刀客自出自入禁區等亂象不絕如縷，冇爆大鑊算係好彩；至於新空管系統三日一小鑊，五日一大鑊，唔係出現「鬼機」就係畫面突然消失，分分鐘牙煙過恐襲吖！
講起上嚟都幾羞家，香港成日自詡國際航空樞紐，但就要服務冇服務，要安全冇安全，唔怪得國際排名跌跌不休喇！