公務員唔憂打爛鐵飯碗，薪高糧準福利高係人都知，更加令人既羨且妒到眼火爆嘅係，公務員有唔少待遇極佳嘅翻閹機會。簡單咁講，公務員隊伍隨時能夠私相授受明益自己友，作為普通市民嘅你連申請入職嘅門路都冇。功夫茶有一個諗法，唔知可唔可以向平等機會委員會投訴，然後申請法援打官司告到佢甩褲嘅呢？喂，人人生而平等，冇理由公務員特別平等啫！
就好似食物環境衞生署咁吖，明益自己友嘅個案最少二十六宗，受惠者係透過公帑養到肥肥白白嘅退休公務員。當中翻閹得最過癮嗰個叫做勞月儀，現年六十一歲嘅佢退休前係助理署長，未經公開招聘程序就翻閹為小販資助計劃小組統籌主管，月薪超過九萬元，兩年合約總薪金大約二百二十萬元，加上約滿酬金一成半，兩年後可得到二百五十萬元左右。
唔好唔記得喎，退休公務員有資格咬長糧嘅大不乏人，勞月儀兩年前一筆過領取七百二十幾萬元退休金，之後每個月長俸有四萬三千元。亦即係話，呢一位翻閹官員得享「孖裝厚待」，加加埋埋每月收入超過十三萬元，仲好過未退休之前呀，衰鬼！
「東方報業民意調查」顯示，對於食環署翻閹二十六名退休公務員，大部分職位冇公開招聘，三成三受訪者直斥做法不公平，變相剝奪市民搵工機會；三成要求署方交代冇公開招聘嘅原因；兩成七批評公開招聘制度形同虛設。至於翻閹勞月儀咯喎，三成七受訪者認為有人享受雙重福利；三成不滿公帑未有妥善運用；兩成三覺得必須檢討有關薪酬福利制度。
唉，功夫茶講過好多次啦，真係好後悔當初冇加入公務員隊伍，否則今時今日或者已經豬籠入水。本地官僚好架勢o架，一於懶理納稅人感受，利用公帑開設筍工職位眉頭都唔皺一下。食環署其中二十四個翻閹職位叫做「食品管制助理」，每星期工作時間只不過係二十四小時咁大把，月薪竟然有二萬三千幾元咁多喎，兼職收入好過唔少正職工作。對於呢一種超級筍工，三成九受訪者質疑部門巧立名目益自己友；三成六覺得公帑運用應該公平公正；一成四批評招聘員工及薪酬釐定欠準則。
咦咦咦，諗諗下唔對路，就算有人向平機會投訴都未必有用。你知啦，平機會主席周一嶽本身都係翻閹高官，而且退休之前係公認嘅廢官，向一個明益自己友嘅受惠者投訴又有乜嘢意義呢？不如咁啦，唔好勞煩已經淪為退休高官俱樂部嘅平機會，直接向申訴專員公署討公道啦！