唐代詩人孟浩然有詩句︰「不才明主棄，多病故人疏」；後來紀曉嵐稍稍改為「不明財主棄，多故病人疏」，用嚟諷刺庸醫。其實今時今日香港都係差唔多，醫療事故鑊鑊新鮮鑊鑊甘，最慘係大部分發生喺公立醫院，病人根本避無可避。
呢嗱，話口未完又嚟嘞！瑪嘉烈醫院一名內科年輕護士原定為患末期腎衰竭嘅男病人輸血，點知核對身份求求其其，淨係口頭問吓就算，結果輸錯血達五分鐘之久至被發現。原本腎衰竭嗰名病人嘅O型血，咁啱得咁蹺適合捐畀被輸錯血嘅AB血型病人，否則分分鐘搞出人命，唔怪得連該院血液學顧問醫生都形容今次「純屬幸運」。
有立法會議員就講得啱嘞，護士為病人輸血前核對身份係「基本功」，無論係學校抑或醫院一定有教過，加上涉事護士並唔係學護，更加冇理由出錯或做漏，成件事擺明係個人失誤。
正所謂差之毫釐，謬以千里，醫護人員做嘢甩漏，病人未必次次都咁好彩可以執番條命。又係瑪嘉烈醫院喎，之前有醫護人員懷疑遺漏為血癌男病人安排關鍵覆診期，病人病情其後急轉直下，送院急救時院方又懷疑冇及時為佢驗血，就係咁個病人最終不治。
類似嘅低級錯誤，已經唔係一次半次發生，而係周而復始，沒完沒了。腦部、膝頭、眼睛……人體任何分開左右嘅器官，醫護人員做手術時都有本事掉轉。打開醫管局嘅「風險通報」，派錯藥、手術後將物件遺留病人體內，以至將男女病人醫療數據撈亂，五花八門，無奇不有，直頭驚悚過希治閣電影。而最離譜嘅係，每次爆大鑊，醫管局例牌菜話徹查事件，例牌菜話會檢討機制，到最後都係高高舉起，輕輕放下，幾乎從來冇見過有人要孭飛。
有人將醫療失誤不絕如縷歸咎於前線人手不足，十個煲得七個蓋，以致忙中出錯。呢鋪講法要戒啦，私家醫院無論資源同人手都充足好多，咪一樣烏龍百出，事故不絕。早排有間私院為鼻咽癌男病人做電療，居然張冠李戴，搞錯咗另一名病人嘅電療計劃。淨係今年至今，衞生署最少已經接獲兩宗私家醫院呈報嘅醫療風險警示事件，情況都咪話唔嚴重。所以幾時都話，人的因素第一，係要唔帶個心返工嘅，多多人手都係嘥氣。
唔講中國古代「醫神」孫思邈「人命至重，有貴千金」嘅名訓，亦唔講西方「醫師誓詞」裏面「余之唯一目的，為病家謀福，並檢點吾身」嘅崇高目標，做人最緊要過得人過得自己，試吓病人係醫護嘅家人仔女，睇吓佢哋仲有冇咁粗心大意！