「自由自由，多少罪惡假汝之名而行」，台灣《自由時報》口口聲聲「台灣優先，自由第一」，實際上生安白造、無中生有、撩是鬥非樣樣齊，醜聞多過天上星，正正係濫用自由嘅最典型例子！
《自由時報》網站日前引述《東方日報》有關外逃內地商人郭文貴嘅報道，跟住又無喇喇批評本報報道「捕風捉影」，點止自打嘴巴吖，直頭係影衰傳媒形象。有台灣學者就講得啱嘞，對於新聞同業嘅消息來源有疑問或疑點，應該向同業詢問釐清報道，而唔係擅自批評審判，《自由時報》連最基本動作都唔做就亂咬一通，你話同狂犬吠日有咩分別吖。
講真，《自由時報》有名你叫「台灣之恥」、「媒體之恥」，個朵早就臭晒，同佢哋講傳媒操守，等於對牛彈琴。《自由時報》弄虛作假，前科纍纍，其中最經典一次，係當年教宗本篤十六世接見台灣各界人士，點知到照片喺該報出街時，竟然唔見咗《聯合報》發行人王效蘭嘅身影，懷疑畀人用電腦技術執走，問你服未！
嗱，咪以為係個別事例吖，更離譜嘅畸士多到數都數唔晒。好似○九年《自由時報》頭版圖文並茂，報道總統馬英九下鄉期間車隊「霸道濫權」，喺國道飆車之餘仲要求其他道路使用者讓路，點知一個屈尾十被踢爆照片其實係合成嘅，照片中出現嘅仲居然夠膽死係阿扁嘅車隊，呢份報紙有幾多公信力，畫公仔唔使畫出腸喇啩。
講開教宗，現任嘅方濟各亦係假新聞嘅受害者，佢曾經狠批有啲媒體公器私用，利用假新聞抹黑誹謗政治對手，認為唔單止罪大惡極，更加係有如coprophilia（嗜糞症）一類嘅病態。按照教宗嘅邏輯，《自由時報》唔知算唔算「嗜糞媒體」呢？正如有網友諷刺，該報奉行「三不報」原則──大陸新聞不報（負面新聞例外）；對台獨不利新聞不報；扁家貪腐不報。好明顯，該報弄虛作假除咗譁眾取寵博銷路，背後更加有不可告人嘅政治目的。《聖經》話︰「為甚麼看見你弟兄眼中有刺，卻不想自己眼中有樑木呢？」《自由時報》指摘人哋「捕風捉影」，點解又唔諗吓自己「聞臭吃糞」？
始終都係嗰句，人不犯我，我不犯人；人若犯我，我必犯人。本來呢，一份係長期鼓吹分裂嘅台獨報章，一份係站穩民族立場嘅香港報章，各有各嘅辦報風格同讀者對象，道不同不相為謀，之不過有人係都要挑起事端撩交打咯喎，最緊要記住廣東人呢句說話︰「先撩者賤，打死無怨」就得嘞！