正所謂衰開有條路，港鐵前日兩度「跪低」，其中一次發生喺傍晚放工高峰期，多達十萬乘客受影響，第二朝又有列車報錯總站，搞到乘客白行冤枉路，有人諷刺「港鐵服務，日日退步」、「票價年年加，服務日日差」，可謂一針見血。
就講前晚「斷纜」嗰劑吖。觀塘線彩虹站及九龍灣車廠之間一個固定架空電纜嘅裝置損毀，引致電力供應中斷，港鐵前前後後花咗接近三個鐘至完成搶修，有列車塞正喺隧道，乘客被迫摸黑「走軌」，狼狽萬分之餘，更有多人不適送院。港鐵早唔斷纜遲唔斷纜，偏偏揀正放工放學時間至嚟斷，結果搞到成個東九龍陸路交通大癱瘓，巴士站打晒蛇餅，有小朋友九龍灣放學返樂富，平時半個鐘搞掂，前晚就要成三個鐘，你話港鐵係咪害人不淺吖。
港鐵出事後指示不足，資訊發布緩慢，疏散乘客混亂，不在話下，最令人難以接受嘅係，港鐵補鑊嘅三粒鐘當中，大部分時間用嚟查找故障地點，真正用喺維修嘅只有約十分鐘。鬼咩，原來港鐵人員用嘅係最原始嘅目測方式，蚊都瞓蛇都死喇！聽講港鐵每條線路都配備一隊應變小組，點知一出事都係搞到倒瀉籮蟹，仲有冇荒謬啲吖。
有人質疑今次出事嘅觀塘線，投入服務已經近四十年，系統老化在所難免，究竟仲有幾多安全隱患冚埋冚埋，真係冇人話得埋。港鐵方面例牌梗係輕描淡寫，強調睇唔到有任何一條線路嘅環境有特別問題，但就好難釋除公眾疑慮，事關除咗觀塘線，荃灣線固定鋼軌嘅石屎基座早排亦發現多處裂縫，部分甚至出現移位迹象，繼續掉以輕心，闊佬懶理，遲早爆大鑊都似。
當然喇，話又要講番轉頭，相對倫敦、紐約，香港地鐵系統算係年輕，點解人哋又可以照樣運作呢？再講吖，港鐵年年豬籠入水，貴為全球最賺錢嘅地鐵公司之一，照計喺維修保養方面有充足資源，家陣居然連檢查故障嘅機器都冇件，點講都講唔過去喇下話。
所以話啫，機件老化唔係最大問題，港鐵管理心態僵化先至大鑊。佢哋就係睇死乘客冇得揀，三日唔埋兩日跪低又如何，票價年年只加不減又如何，乘客咪又係焗住要幫襯佢哋，喺呢種「店大欺客」嘅心態底下，服務質素唔插水至奇喇。唔好忘記，本港公共交通網絡愈來愈倚重鐵路，將來再爆類似斷纜事故，後果只會更加嚴重嘅咋。
始終都係嗰句，港鐵雖然係上市公司，但港府係最大股東，市民先係最大老闆，今時今日咁嘅服務態度點掂o架！