夕陽政府時日無多，高官疊埋心水等收工就梗嘅喇，點知連部門員工都hea埋一份，好似唔憂做咁款。淨係香港郵政咋，又有員工被踢爆蛇王吞pop呃鐘騙補水樣樣齊，簡直鑊鑊新鮮鑊鑊甘。
嗱，繼本報月前踢爆沙田派遞局有郵差集體蛇王隊啤後，灣仔胡忠大廈嘅灣仔派遞局郵差竟然仲未識死，被揭發連日喺後門踢毽消遣，一踢就成粒鐘，返工變健身，都咪話唔爽。最蹺蹊嘅係，上述郵局嘅運作時間係朝八晚四，而呢班「踢毽達人」好似校啱鬧鐘咁，每日下晝四點出動，踢到五點幾至收工，呃OT錢嘅嫌疑水洗唔清喇。
唔係亂噏o架，郵差呃鐘補水早有前科，誇大所需處理嘅郵件數目有之，返工時間詐病、落班後突然「康復」又有之，只有你諗唔出，沒有佢做唔到，就連審計署及立法會帳委會都頂佢哋唔順，多次開腔炮轟。可惜吖，你有你鬧，香港郵政一於少理，好似舊年咁，處理郵件嘅數量較前年減少一千五百萬件，但部門人手仍然維持七千人，逾時工作津貼開支高達一億八千幾萬元。喂，工作減少，人手不變，點計都冇可能需要長時間OT啩，話當中冇古怪喎，三歲細路仔都唔信喇。
真係諗極唔明，眼見員工出蠱惑搵着數，任何公司嘅管理層都冇可能坐視不理，偏偏香港郵政視若無睹，任由每年億億聲嘅OT津貼倒落鹹水海，點止係管理有問題，直頭有欺詐之嫌，老廉好應該查一查。再講吖，香港郵政業績長期見紅，近八成郵局蝕到趴街，明顯係服務不合時宜，管理層唔係諗辦法提高競爭力，反而破罐破摔，唔係提早關門，就係放縱員工蛇王偷懶。一句講晒，上樑不正下樑歪，管理層都係做一日和尚敲一日鐘，咁就唔怪得員工有樣學樣，hea得一日得一日咯。
話時話，天下烏鴉一般黑，hea做呢家嘢，點止香港郵政吖，睇吓環保署及食環署咪知囉，學人喺社交網站推介「惜食食肆」喎，又唔做足功課，結果推介埋啲無牌食肆，直頭鼓勵違法，離晒大譜，好彩顧客未至於病從口入咋。咁你話啦，港產官僚尸位素餐，胡混度日，邊係真心真意為市民服務o架，貪個鐵飯碗夠硬淨之嘛。
學電視廣告話齋，今時今日咁嘅服務態度點得o架。港產官僚個個薪高糧準，納稅人對佢哋不薄，但得到嘅係乜嘢服務態度呢？換着私人公司，呢啲廢官冗員一早炒得喇。好彩香港有第四權咋，所有庸官劣吏喺傳媒監察下通通現形，想蒙混過關，咪使旨意吖！