武俠小說話齋︰最安全嘅地方往往最危險。好似公立醫院咁，醫療事故沒有最離譜，只有更離譜，病人就算好彩避得開庸醫，亦未必避得開祿山之爪甚至狼吻，你話係咪危險過火星吖。
話口未完又有一單。伊利沙伯醫院一名廿四歲男護士投訴喺宿舍更衣室，被一名來港交流嘅印度籍男醫生施以「鹹豬手」摸臀非禮，報警求助。無獨有偶，葵涌醫院精神科病房日前亦爆出同類案件。一名成年男病人投訴被另一名成年男病人非禮。
講真，類似事件已經唔係第一次發生，淨係九龍醫院，今年已經發生最少三宗病人被非禮案，其中喺今年一月揭發嗰單，受害嘅十七歲精神科男病人，被四名病友侵犯達一個月之久，如果唔係事主母親探病時獲其他病人告知，院方可能到依家仲係懵閉閉。
對於公立醫院接二連三爆出風化醜聞，醫管局急急推出幾招補鑊，包括安排病人入院前接受評估，缺乏自我照顧能力嘅會被安排單人房，又會喺院內加裝閉路電視進行監察，以及教育病友遇到或目擊有人被侵犯，要即時舉報；另外又會聘請英國專家來港，協助檢視照顧精神科病人嘅程序。
喂，反應仲有冇再遲鈍啲吖，係人都知精神科病人缺乏溝通同自理能力，需要額外照顧，依家至提一籃子補鑊措施，即係話以前求求其其收病人入院就當做咗嘢，之後就闊佬懶理，關人個關，到底仲有幾多風化醜聞臭屎密冚，真係冇人話得埋。至於請外國專家檢討咯喎，以港府一向盲信洋和尚會唸經嘅作風，可以話係指定動作。本來呢，只要有助解決問題，華洋意見應該一體接納，怕只怕當局淨係做場檢討騷敷衍公眾，意見接受態度照舊，咁就講乜都嘥氣喇。
一節見則百節知，醫管局管理混亂，公立醫院保安猶如無掩雞籠，點止風化案咁簡單吖。試過有人假扮醫生潛入聯合醫院，連續十幾次都冇人發現，進入病房重地如入無人之境；又試過有女精神病患者潛入屯門醫院女更衣室，偷取護士制服同職員證後，大模廝樣喺醫院內四處「巡房」，其他好似將病人姓名及身份證號碼等隨意亂放、將病人資料當廢紙循環再用等，保安漏洞簡直多如牛毛。
講到底，公立醫院亂象叢生，嗰班坐擁高薪厚祿嘅醫管局高層難辭其咎，換轉私人機構衡工量值，好多人一早就要執包袱滾蛋。港府成日話要徹底改革醫管局，點知次次都係雷聲大雨點小。咪話功夫茶唔提醒，港府一味諱疾忌醫，唔敢對公共醫療系統動大手術，亂象只會陸續有來嘅咋！