康署官僚冇靈魂 亂換地磚跣市民

係咁嘅，康文署舊年十月起花費一千七百萬元，為轄下觀塘麗港公園進行翻新工程，點知懷疑因為選用地磚不當，防滑度不足，重開唔夠半個月就有多名途人中招，甚至有人跌傷背部要入醫院照X光。本報記者問過街坊，個個有彈無讚，形容落雨時十足十溜冰場，反而舊磚有凹凸紋唔跣腳，康文署無喇喇整撻瘌，你話係咪唔衰攞嚟衰吖。

正所謂有錯要認，打就企定，立法會議員反映市民投訴，你估康文署點回應吖嗱？佢哋強調地磚符合政府工程要求，仲話如果市民有證據證明係由於署方提供嘅設施有不當引致受傷，可以按既定程序提出民事索償喎。咁即係點？即係「有本事告我吖，笨」，仲有冇再官僚傲慢啲呀？港產官僚成日畀人話唔死人冧樓唔做嘢，真係冇鬧錯佢哋，問題係第時一個唔好彩有市民發生嚴重意外，賠幾多錢都補唔番。

最好笑嘅係，署方一方面強調冇入錯貨，另一方面又承諾餘下工程換過批地磚，真係乜都佢哋講晒。其實成件事掉番轉諗就得，試吓係官老爺自己屋企裝修，睇吓佢哋會唔會精挑細選，貨比三家，驗屍咁驗吖嗱。一句講晒，反正都係阿公出錢，求其完成任務就當交咗功課，係好係醜都唔需要負責，至於第日爆大鑊第日先算，以官老爺做一日和尚敲一日鐘，多一事不如少一事嘅處事作風，就梗係四個大字──關人隱士喇！

一滴水可以睇穿整個世界，其實官老爺只要走出冷氣辦公室，多啲落區巡吓，類似低級錯誤根本唔會發生。可惜吖，港產官僚就係咁堅離地，好似房署咁，斥資五億元公帑為公屋住戶更換俗稱「三支香」嘅晾衫架，結果因為設計出問題，居然要另外再花近四億元填氹補鑊。鬼咩，班高官一個二個身嬌肉貴，下下有專人服侍，莫講話晾衫，連洗衣機都未必識用，咁搞法唔出事至奇喇！

講到呢度，大家明白點解次次審計署同申訴專員公署批評部門失職，房署同康文署幾乎次次榜上有名喇。公務員辭職比率過去一年創出新高，據講唔少係因為頂唔順壓力而劈炮。即係咁，害怕壓力都叫做對自己工作有啲要求，留得低喺度嘅，唔使問阿貴都係抱住行行企企等收工，無風無浪又一day嘅hea做心態，劣幣驅逐良幣咯喎，香港想有運行都幾難！