用生命延續生命 用捐贈傳遞大愛

係咁嘅，四十三歲好媽媽因為急性肝衰竭急需換肝續命，本來長女願意捐肝救母，可惜吖，因為佢尚欠兩個月先至滿十八歲法定捐贈器官年齡，結果只能空着急。可能孝感動天啩，二十六歲女文員知道呢件事後，毫不猶豫自動獻身，尋日進行長達八小時嘅活體捐肝手術，真正話畀人知乜嘢叫無私大愛。

你知啦，家陣要人死後捐贈器官都唔容易，要活體捐贈就難上加難，何況活體捐贈有一定風險，大家又非親非故，就算香港人平時幾鍾意做善事都好，講到要冒住生命危險救人喎，真係冇幾多人肯制o架。所以話，救人女文員真係好偉大，佢屋企人咁支持亦係好偉大，所謂好心有好報，佢哋一定會福有攸歸啫。

講開又講，港府成日話要鼓勵市民登記器官捐贈，一時話要加入通識科課程，一時又話會研究「交叉器官捐贈」，講到天花龍鳳咁款，實情係效果有限，甚至有市民願意捐贈都無從入手。呢，好似今次個女文員咁，早喺兩年前已想活體捐肝救人，點知致電醫院熱線竟然無人回覆，最後只好放棄，今次之所以成功捐肝，全因佢鍥而不捨打爆醫院熱線咋。咁你話嘞，救人如救火，偏偏當局連基本嘢都搞唔掂，熱線形同虛設，到底係咪有誠意推廣器官捐贈，畫公仔唔使畫出腸喇。

唔係咩，如果港府真係有誠意，好應該立下榜樣，由高官帶頭做起。大家有眼見，除咗食衞局局長高永文爆響口話已經登記器官捐贈，就睇唔到其他高官倣效，既然港府都係得把口，咁就唔怪得咁多年來全港登記人口都係得嗰百分之三咁大把。講真，移風易俗呢家嘢，宣傳固然重要，以身作則更加唔少得，好似中國人傳統興土葬，但喺內地歷代領導人帶頭簽字火葬嘅號召下，觀念已經徹底改變，港產官僚點解唔學吓呢？

今次事件亦令人關注未成年人捐贈器官問題。好似病人長女咁，雖然明白晒捐贈器官有乜風險，亦好想救番媽媽，但因為差少少先至成年而乜都做唔到。冇錯，法例原意係保障未成年人嘅權益，但法律不外乎人情啫，高永文話會檢討係咪可以增加酌情權喎，咁就講多無謂，行動最實際，事關唔係次次都有人肯捨身救人咁好彩o架。