大家一定記得，候任特首喺競選期間曾經向一名乞丐大手筆施捨，點知事後被人揭發乞丐來自內地丐幫集團，善款凍過水事小，善心被人欺騙事大。連堂堂準特首都中招，唔怪得愈來愈多市民唔敢輕易行善咯。
唔係講笑，近年所謂嘅慈善機構多如雨後春筍，募捐活動遍地開花，佢哋到底係乜嘢來路，帳目係咪清楚，啲錢係咪用於慈善用途，莫講話一般市民唔知道，港府一樣矇查查嘅咋。
嗱，最新一份審計報告就踢爆種種亂象，例如有慈善機構公然違反規管文書向董事支薪，三年間支薪過千萬元，好過去搶，就算稅局介入一樣少理，而且免稅地位依然穩如泰山；又例如有慈善機構成立十幾年都冇運作，稅局問起就以「將來計劃」蒙混過關，咁又得米繼續免稅；仲有慈善機構以免地價或優惠方式獲政府批地，結果變成同慈善風馬牛不相及嘅商業運作，做酒店有之，做服務式住宅又有之，有啲仲同時得到政府資助，賺咗錢又係落自己袋，怎一個爽字了得！
好明顯喇，有人打着慈善名義招搖撞騙，仲要係無本生利嗰隻，加上法例冇規定慈善機構必須公開財務報告，等同為愛心騙子提供行騙土壤。港府長期隻眼開隻眼閉，唔話係為虎作倀都唔得喇。好似稅局咁，明知免稅條例漏洞多多，依然闊佬懶理，淨係一四至一五年度咋，慈善機構獲稅務減免嘅總額就超過一百億元，家陣只會更多，庫房蒙受損失唔在講，市民愛心打水漂先至罪大惡極。又好似地政總署吖，批地批得咁爽手，監管就是是但但，就算審計署幫手諗埋計，建議喺批地契約加入不得分派利潤規定，地政官僚一句「不適用」就打交叉，有冇再離譜啲吖。
話時話，年前曾有外媒報道過呢方面嘅問題，仲幫香港起咗個朵叫「慈善欺詐天堂」添，都咪話唔羞家。正如立法會議員話齋，港府有必要成立專門監管機構，統一發牌及設定行政收費上限，仲要規定公開財務報告，挽回市民信心。可惜吖，港府好似借咗聾耳陳隻耳咁，係都要扮聽唔到，結果咪亂象叢生囉。
即係咁，電騙黨、寶藥黨、祈福黨呢啲行騙集團固然衰到貼地，但部分慈善機構利用愛心呃人，危害仲大，市民見過鬼怕黑，以後仲邊敢真金白銀幫人喎。所以話啫，愛心騙子可惡，點都唔夠尸位素餐嘅港產官僚可惡，當局繼續放任自流，不監不管，唔只真正造福社會嘅慈善機構受連累，最終受害嘅係弱勢社群，你話該當何罪吖！