港府開口埋口叫人唔好做大嘥鬼，實情係監管懶懶閒，又鍾意閉門造車，結果令浪費問題變本加厲。呢，新公屋大量基本設施被人當垃圾丟棄，增加堆填區負擔，咪就係問題嘅冰山一角囉。
係人都知，房署會為每個公屋單位提供基本設施，但就唔係每個租戶都會領情，一裝修就拆到蓉蓉爛爛，製造大量建築廢料。好似沙田水泉澳邨咁，第三、四期公屋逾四千戶最近陸續入伙，裝修工程如火如荼，本報記者巡查發現，幾乎每層樓嘅大堂都變成垃圾崗，新簇簇嘅鋅盆、灶台、木門堆積如山，簡直暴殄天物。
本來呢，大嘥已經夠衰，點知裝修工人一味貪方便，唔肯將建築廢料丟去指定地點，加埋煙頭及天拿水隨處亂棄，連逃生通道都受阻，卒之一個月內發生四宗火警，其中三宗仲可能係蓄意縱火，唔驚就假。搞成咁，咪以為唔關房署事喎，如果唔係佢哋有法不依、執法不嚴，點會咁大鑊呀。
點解咁講？好簡單，現時房署將公屋固定設施分為甲類及乙類，甲類涉及結構安全，不可改動；乙類則屬可改動，包括鋅盆、廁所門、灶台等，但必須事先提出申請。好明顯，現時被租戶丟棄嘅雖然係乙類設施，但連裝修師傅都承認十之八九冇事先申請，房署隻眼開隻眼閉咯喎，點會唔亂象叢生吖。
仲有喎，雖然唔少租戶嫌棄設施「唔靚仔」，寧願花錢大執，但亦有好多租戶係因為設施唔啱用，迫於無奈拆掉。例如公屋地方淺窄，房署偏偏幫浴室安裝木門，一打開就頂住廁所，問你服未；又例如灶台及鋅盆妨礙安裝煮食爐，雪櫃又擺唔落，唔拆唔得。咁你話喇，房署官僚一味坐喺冷氣房諗嘢，同現實脫節，係咪製造浪費嘅元兇吖？
即係咁，呢啲問題都唔係始於今日咯，區議員及關注團體一直有出謀獻策，包括建議房署同回收商合作，將有用嘅設施循環再用；或者收樓前向租戶發意向書，睇吓佢哋是否需要先至安裝；又或者嚴格執行扣分制，以儆效尤；當然最徹底就係改善設計，咪再搞埋啲唔等使嘅嘢。可惜吖，你有你講到口水乾，房署一於少理，吹脹！
梗係啦，不花白不花，花了也白花，橫掂都係公帑，點浪費都唔肉痛。講起就火滾，公屋用納稅人嘅錢興建，房署不過代為管理，咁簡單嘅事都搞到一塌糊塗，唔止浪費公帑，製造環保災難，仲構成消防隱患，話呢班廢官害人不淺就係咁解。計功夫茶話齋，將建築廢料送去高官官邸就啱嘞，到時針拮到肉知痛，睇吓佢哋仲敢唔敢縱容浪費吖。