寧做香港鬼 不做中國人

點解認同「香港人」嘅比率咁高，而自認「中國人」又咁低嘅呢？要回答呢一條問題，功夫茶想先同大家分享一則小故事，相當發人深省o架。

前幾日喎，紅磡國際郵件中心對開海面發現長髮女浮屍，年紀大約三十至三十五歲，聽講樣貌娟好。最奇特嘅係，消防蛙人將屍體撈上岸檢查，發現事主左手掌心用黑筆寫上「做不成香港人，但願做香港的鬼」，懷疑係臨終遺言。

女死者到底因乜事幹自尋短見，功夫茶唔係大偵探又唔係生神仙，當然無從稽考，有待相關單位揭開謎團。之不過咁，既然遺言係「但願做香港的鬼」，當中就大有玄機嘞。死者會唔會係內地同胞？會唔會係「來生不做中國人」嘅忠實信徒？你知啦，幾年前有一項民意調查發現，六成內地同胞選擇來生不做中國人，後來仲有人寫咗一本同名嘅暢銷書。

好嘞，小故事講完，講番認同「香港人」遠遠多過「中國人」呢一條問題。答案其實呼之欲出，中國人形象確係太差。

中國人形象之差，簡直舉世嘩然，罪魁禍首主要有兩大類，第一類係黑心食品，第二類係白色恐怖。黑心食品五花八門無處不在，乜鬼嘢毒奶粉，乜鬼嘢坑渠油，乜鬼嘢瘦肉精，罄竹難書。北京有一位小妹妹，只不過食咗街邊炸雞之嘛，居然劇毒攻心小命不保。亦即係話，中國人道德淪喪到不惜為咗謀財而害命。

至於白色恐怖，呢家嘢又係令人悲憤莫名。維權人士只不過發表幾篇文章之嘛，居然構成一大座以言入罪嘅文字獄，罪名係極之誇張嘅煽動顛覆國家政權。你係毒奶粉受害家長想討回公道咩？對唔住，你犯咗尋釁滋事罪。

所以咯喎，真係難怪市民認同「香港人」遠遠多過「中國人」，正如冇人會願意認賊作父，姓秦嘅人從來唔會認秦檜係祖先。

寧做香港鬼，不做中國人，一講到民族大義好似好沉重，一個唔覺意仲要隨時被失蹤。不如咁啦，等功夫茶同大家講一個笑話輕鬆一下。如果伊甸園嘅亞當同夏娃係中國人，就唔會忤逆上帝旨意，受到蛇嘅誘惑去食禁果。點解呢？因為佢哋會先食咗嗰條蛇。