嘩嘩嘩嘩嘩！港人之光呀！食衞局局長周一嶽獲頒一項國際大獎，簡直光宗耀祖！
乜嘢獎咁巴閉呢？係咁嘅，世界衞生組織將每年五月三十一日定為「世界無煙日」，提醒公眾煙草禍害，並且提倡健康生活。世衞每年選出控煙工作方面有傑出表現嘅個人或團體，頒發「世界無煙日特別總幹事獎」以及「世界無煙日獎」，藉此肯定控煙成就。今年咯喎，周一嶽獲頒「世界無煙日特別總幹事獎」。
周一嶽嘅得獎感言係咁講嘅，有關獎項屬於全香港，感謝市民同立法會議員支持增加煙草稅。周局長又話，最近提出增加煙草稅獲得六成市民贊成，更加有市民認為可以再進一步調高稅率。
當然啦，煙民絕對唔認同增加煙草稅，十多名由煙民同報販組成嘅「稅債票償大聯盟」，走去頒獎禮場外請願，指摘政府大幅加煙稅會令更多人購買走私香煙，呼籲煙民登記做選民，用選票表達意見。
計功夫茶話齋，吸煙固然唔值得鼓勵，之不過政府嘅做法由始至終都係偽善。點解咁講呢？呢嗱嗱嗱，最近台灣飲品被揭發含有致癌起雲劑，全世界喊打喊殺，商舖急急腳將貨品下架。又好似過往不時出現嘅黑心食品，只要有少少毒性，基本政策係一律回收嚴禁販賣。既然係咁，吸煙又話致癌，又話爛腳，又話陽痿，因乜事幹仍然容許合法銷售？點解唔一了百了列作毒品？
偽善之處就係，政府一方面苦口婆心叫人戒煙，甚至千方百計唔准煙民吸煙，另一方面竟然收取龐大煙稅，心血來潮又大幅提高煙草稅。打個譬喻吖，周一嶽試下走去收「Ｋ仔稅」，肯定畀人剷上天花板！
煙民唔係講得冇道理㗎，大幅加煙稅會令更多人購買私煙。你知啦，普通私煙就話問題不大啫，之但係國內同胞乜鬼嘢傷天害理嘅奸險行為都做得出，私煙隨時係假煙。冇耐之前英國傳媒揭發，中國奸商賤價購入非洲劣質煙草，經香港運返內地加入有毒化學物質製成假煙，再運到世界各地販賣，所含有害成分遠比真煙高出二十倍。一個唔覺意，劇毒假煙流入香港，煙民唔止陽痿，瓜老襯都得啦！
所以咯喎，控煙控到本末倒置嘅周一嶽其實更加應該獲頒另一獎項，而頒獎人係假煙私梟。梗係啦，周局長為假煙私梟帶來財源滾滾吖嘛，當然要頒發一項「世界私煙日特別偽君子獎」，表揚佢老哥淨係識得叫人戒煙，完全冇魄力同勇氣徹底杜絕吸煙！