黑心食品無疆界，台灣致癌塑化劑「起雲」作用名不虛傳，愈揭愈大劑，搞到兩岸三地以至全世界「毒雲洶湧」，人心惶惶。如果港府唔能夠盡快完善機制，堵塞檢測漏洞，市民對食品安全遲早會信心崩潰，冇啖好食，冇嘢敢食。
台灣係呢次風波嘅源頭，愈來愈多食品被發現已受有毒塑化劑污染，人人聞之色變。繼健康飲品、食品同藥用糖漿之後，台北著名景點士林夜市嘅飲品攤檔，亦可能喺飲品中加入咗塑化劑。為防夜長夢多，台灣當局一於快刀斬亂麻，要求所有含「起雲劑」食品同飲料嘅商家，最遲今日要提供檢驗合格嘅安全證明，冇嘅話一律下架唔准賣，違例更會被處以重罰。
本港食物安全中心尋日公布最新化驗結果，有兩款由台灣入口嘅運動飲料驗出含有塑化劑超標，今日起禁止入口；另外有一款兒童成長鈣片亦被驗出有塑化劑。食物及衞生局局長周一嶽話，入口商方面非常合作，自行將問題食品停售或者下架喎。
人比人比死人，台灣速戰速決，香港就下下歎慢板。橫睇掂睇，港府做嘅硬係差少少。差啲乜？咪就係主動做嘢囉。嗱，本港市面有唔少台灣出產嘅食品售賣，台式飲品更加成行成市。家陣有毒塑化劑喺台灣爆大鑊，但食安中心嘅恒常檢測項目入面，呢樣嘢偏偏係零檢測。講真，衞生當局應該主動出擊，盡快全面檢測塑化劑，而唔係被動咁等人哋報告先至做嘢。
仲有呀，雖然本港對問題食品採取回收措施嘅法例已經通過咗，但到依家都仲係得個睇字。周一嶽話，目前塑化劑市場風險唔大，會留意情況至決定幾時同埋有冇需要引用相關法例。致癌塑化劑殺到埋身，當局應該快快脆脆攞起呢把尚方寶劍斬草除根，防止有毒塑化劑繼續荼毒市民。如果好似周一嶽咁，等入口商自己做嘢，萬一有乜疏漏令毒禍蔓延，呢隻鑊邊個孭先？
講開又講，今個五月直頭係食品業嘅「黑色五月」，被揭發嘅黑心食品無奇不有，淨係內地，就先後有色素菠菜麵、染色荔枝、藥水豆芽、工業鹼魷魚、哥士的豬皮、污水饅頭、福爾馬林鴨紅、硫磺竹筍、毒炸雞烤鴨，仲有致癌爆炸西瓜等等。跟手又到寶島台灣「接力」，而且一鳴驚人，愈演愈烈，中招嘅食品多種多樣，幾乎無孔不入，被形容為「台版三聚氰胺案」，真係一啲都冇誇張。
唔怕一萬，最怕萬一。咪話功夫茶唔提醒，港府必須行多一步，無論食品來自內地又好，台灣也罷，都要加強檢測，嚴格把關，重拳執法，確保冇漏網之魚，等香港人食得放心，食得開心。